Dhjetë vjet më parë, më 9 nëntor 1999, shërbimi i Zërit të Amerikës në gjuhën shqipe bëri një hop të shpejtë por të vendosur për t'iu përgjigjur ndryshimeve në strukturën e mediave në Shqipëri, Kosovë dhe Maqedoni. U realizua kalimi nga radioja në transmetimet me televizion. Ky kalim, krijoi mundësi të jashtëzakonshme që shërbimi shqip t'i drejtohej një audience më të gjerë dhe me kërkesa më të mëdha. 

Nga Ballkani i largët, kronikat video të korrespondentëve dërgohen çdo ditë me internet këtu në ndërtesën e Zërit të Amerikës.

Duke qendruar në kontakt të vazhdueshëm me zhvillimet në rajon, Zëri është njëkohësisht vetëm disa qindra metra larg Kapitolit, selisë së Kongresit amerikan, një pikë e rëndësishme referimi për të matur pulsin e zhvillimeve botërore, duke filluar nga Uashingtoni politik.

Zëri i Amerikës në shqip filloi trasmetimet me radio më 13 maj 1943. Më 1945 transmetimet u ndërprenë. Ato rifilluan në vitin 1951 dhe vazhdojnë edhe sot.

Për pothuajse 5 dekada, Shqipëria u sundua nga një regjim diktatorial, ndër më shtypësit në Europën Lindore. Mungesa e besimit te media e tyre i bënte shqiptarët t'i drejtoheshin gjithnjë e më shumë Zërit të Amerikës.

Shërbimi shqip e vinte theksin gjithashtu te miqësia tradicionale mes popullit shqiptar dhe atij amerikan, duke filluar nga vitet 20, kur Presidenti Woodrow Wilson mbështeti pavarësinë e Shqipërisë.

Në pranverë të vitit 1990, Shqipëria vendosi lidhje të drejtpërdrejtë telefonike me Shtetet e Bashkuara. Më në fund u bë e mundur që Zëri i Amerikës të intervistonte me telefon intelektualë të njohur të cilët shprehnin pikpamje që ndryshonin nga ato të korit zyrtar.

Ndryshimi i regjimit në Shqipëri dhe fillimi i tranzicionit si dhe ngjarjet e rëndësishme politike në Kosovë u mbuluan hap pas hapi nga Zëri i Amerikës fillimisht me radio.

Më pas, televizioni hapi një fushë të re komunikimi me audiencën e cila ka shënuar vazhdimisht rritje.

Arben Xhixho, shef i shërbimit shqip

"Emisioni i ri televiziv prej 30 minutash që zëvendësoi programin e radios të orës 18, ishte një zhvillim i natyrshëm për t'ju përshtatur prirjeve dhe kërkesave të audiencës që preferonte më shumë televizionin për t'u informuar. Kur ne e filluam programin televiziv Ditari më 9 nëntor 1999, shqiptarët po riktheheshin në shtëpitë e tyre në Kosovë me shpresë për të rindërtuar jetët e ndërprera nga fushata e spastrimit etnikdhe nga lufta e asaj kohe. Ndërkohë, Shqipëria dhe Europa Lindore po festonin 10 vjetorin e rënies së murit të Berlinit," thotë Arben Xhixho, shef i shërbimit shqip.

Zëri i Amerikës financohet nga Kongresi amerikan dhe një nga parimet e tij më të rëndësishme është që diskutimi i opinioneve të jetë i përgjegjshëm. Karta e Zërit të Amerikës kërkon shprehimisht që ai të jetë i saktë dhe objektiv.

Stiv Redish, redaktor ekzekutiv i Zërit të Amerikës, pozita numër dy në këtë institucion, ka punuar 20 vjet me radhë për rrjetin CNN. Ai thotë se Zëri i Amerikës bën thuajse të njëjtën gjë që bëjnë edhe mediat e mëdha amerikane.

"Ne përpiqemi që njerëzit të marrin lajmin e saktë, ashtu si edhe CNN-i përpiqet që shikuesit të kenë lajmin e saktë. Ne përpiqemi të japim lajme dhe informacione të sakta, gjithpërfshirëse, të balancuara, informacione që nuk mund t'i gjesh diku tjetër. Ne jemi një institucion të cilin mund ta besosh. Të njëjtën gjë bëjnë edhe rrjetet e mëdha amerikane të medias".

Në botën e sotme globale të shkëmbimit të informacionit sfidat teknologjike janë të ngjashme për të gjithë dhe shërbimi shqip i Zërit të Amerikës i ka përqafuar ato me entusiazëm.

Ndryshimi që ka sjellë teknologjia është gjigand krahasuar me 10 vjet më parë kur Zëri i Amerikës në shqip sapo filloi televizionin: Sot programet mund të shihen në internet, videot në YouTube dhe shikuesit shfaqin opinionet e tyre përmes e-mailit.

Por një gjë nuk ka ndryshuar: natyra e Zërit të Amerikës si një burim i besueshëm, i saktë dhe objektiv informacioni. //kk//