Imazh i marrë nga faqja kompjuterike e medias së Al-Kaidës,  Al-Sahab

Zyrtarë të zbulimit në Shtetet e Bashkuara dhe analistë, thonë se videoja e re e Al-Kaidës është autentike dhe se ajo paraqet Bin Ladenin duke folur muajin e kaluar. Duke ju drejtuar popullit amerikan, Bin Ladeni thotë se ata duhet ta braktisin sistemin tyre demokratik të qeverisjes dhe të përqafojnë fenë islamike, në se dëshirojnë t’i japin fund ndërhyrjes amerikane në Irak. Udhëheqësi i Al-Kaidës, denoncon demokracinë, duke pretendnuar se kjo formë qeverisjeje u shërben vetëm interesave të korporatave të mëdha amerikane dhe gjetkë. Ai po ashtu dënon kapitalizmin, globalizimin dhe ekonominë botërore, si dhe praktika të tjera perëndimore, në një mesazh, që analistët e përshkruajnë si tepër të majtë dhe madje me tone marksiste. Bin Ladeni flet në video pa u ndalur, për rreth 30 minuta në një video të Al-Kaidës. Ai u referohej ngjarjeve më të fundit në Shtetet e Bashkuara dhe në mbarë botën, gjë që i bën analistët të arrijnë në përfundimin se regjistrimi ishte realizuar gjatë javëve të fundit. Presidenti Bush tha se publikimi i videos së re të Bin Ladenit është një kujtesë e gjallë e rreziqeve me të cilat përballet bota:

Kjo është videoja e parë e Bin Ladenit në tre vjet. Ajo publikohet pikërisht disa ditë para 6-vjetorit të sulmeve terroriste të 11 shtatorit të vitit 2001 në Shtetet e Bashkuara. Udhëheqësi i Al-Kaidës nuk bën ndonjë kërcënim të veçantë në videokasetë. Por Presidenti Bush tha se videoja thekson nevojën që bota të qëndrojë e bashkuar kundër sulmeve terroriste.

Presidenti Bush në Sidnei

"Kaseta është një kujtesë për rrezikun që ekziston në botën ku ne jetojmë dhe ajo shërben si kujtesë se duhet të bashkëpunojmë për të mbrojtur popullin tonë."

Zoti Bush i bëri këto komente para gazetarëve në Sidnei, pas përfundimit të takimit me Kryeministrin japonez Shinzo Abe. Presidenti, që rrallëherë komenton për videot e Al Kaidës, këtë herë thotë se në video, Bin Ladeni flet për luftën në Irak.

"Më duket interesant fakti që në kasetë përmendet Iraku, gjë që të kujton se Iraku është pjesë e luftës sonë kundër terrorizmit. Në se Al-Kaida përmend Irakun, kjo ndodh ngaqë kjo organizatë do të arrijë objektivat e veta në Irak, pra që të na detyrojë ne të largohemi prej andej."

 Ai tha se Al –Kaida do të krijojë një vend të sigurtë në Irak, nga ku të kryehn sulme të reja ndaj Shteteve të Bashkuara dhe vendeve të tjera.

"Prandaj, është e rëndësishme, që ne të tregojmë vendosmërinë tonë për t’u vetëmbrojtur, që të mos e lejojmë Al-Kaidën të ketë një vend të sigurtë për t’u mbrojtur dhe të mbështesim demokracitë e reja."

Presidenti është përqëndruar së tepërmi kohët e fundit tek ambiciet e Al-Kaidës, ndërsa përpiqet të mbrojë politikën e tij për Irakun. Të hënën, dy zyrtarët më të lartë amerikanë në Irak, ambasadori Ryan Kroker dhe komandanti amerikan, gjenerali David Petreas, do të dëshmojnë para Komisionit të Kongresit, ku do të raportojnë për gjendjen në Irak.

Vetë Presidenti Bush, thotë se do ta informojë popullin amerikan lidhur me rrugën që do të ndiqet në Irak, javën e ardhshme.//lk