ԱՄՆ-ի նախագահ Ջորջ Բուշը և Ռուսաստանի նախագահ Դմիտրի Մեդվեդևը հայտնել են, որ միակարծիք են առ այն, որ հորդորեն Իրանին դադարեցնել ուրանի հարստացումը: Միևույն ժամանակ նրանք հայտնել են, որ տարակարծիք են ԱՄՆ-ի` Արևմտյան Եվրոպային հրթիռային պաշտպանության համակարգ հիմնելու ծրագրերի շուրջ: Նրանց երկկողմանի հանդիպումը կայացել է Ճապոնիայում` Մեծ ութնյակի ամենամյա գաղաթաժողովի շրջանակներում:
Երկու ղեկավարների միջև հանդիպումն առաջինն էր նախագահ Մեդվեդևի պաշտոնավարության անցնելուց հետո: Նախագահ Բուշը նշել է, որ Ռուսաստանի ղեկավարը խելացի և վստահ և շիտակ խոսող անձնավորություն է: Չնայած նրան, որ Բուշի պաշտոնավարությանը 200-ից պակաս օր է մնացել, ԱՄՆ-ի ղեկավարը վստահաբար նշել է, որ նախագահ Մեդվեդևի հետ նրանք կհամագործակցեն հանուն համընդհանուր բարիքների:
“Ես նշել եմ, որ մինչև պաշտոնավարությանս ավարտը դեռևս վեց ամիս կա և մինչև այդ ես դեռ շատ անելիք ունեմ: Դա նշանակում է, որ մենք միասին մեծ անելիքներ ունենք,” ասել է նախագահ Բուշը: “Բազմաթիվ կարևորագույն խնդիրներ կան, որոնք դեռևս լուխված չեն, օրինակ` Իրանը: Այս առումով Ռուսաստանը և ԱՄՆ-ը սերտորեն համագործակցել են անցյալում և կշարունակեն համագործակցել` Իրանի վարչակարգին հորդորելու հրաժարվել ուրանի հարստացման ծրագրից:”
Ամերիկայի Միացյալ Նահանգները և նրա դաշնակիցները կարծում են, որ Իրանը ցանկանում է միջուկային զենք մշակել: Իրանը սակայն պնդում է, որ ուրանի հարստացումը բացառապես էլեկտրաէներգիա ստանալու նպատակ է հետապնդում:
Նախագահ Մեդվեդևն իր հերթին նշել է, որ երկու ղեկավարները համաձայնել են շարունակել համագործակցությունը Հյուսիսային Կորեայի միջուկային զենքերի մշակման ծրագրի կասեցման աշխատանքների բնագավառում: Սակայն Ռուսաստանի նախագահը շարունակում է հակադրվել ԱՄՆ-ի` Արևելյան Եվրոպայում հրթիռային պաշտպանության համակարգի տեղակայման ծրագրերին:
Նախագահ Մեդվեդևն ասել է, որ նախագահ Բուշը և նա տարաձայնություններ ունեն Չեխիայում և Լեհաստանում ամերիկյան հրթիռների տեղակայման շուրջ: Բուշի վարչակարգը պնդում է, որ հրթիռները նպատակ ունեն պաշտպանելու Իրանի կողմից հարձակումից և ամենևին չեն սպառնում Մոսկվային, քանի որ դրանք նույնիսկ չեն կարող համեմատվել Ռուաստանի հրթիռային հզոր համակարգի հետ:
Նա նաև նշել է, որ երկու նախագահները քննարկել են Վրաստանի հետ հարաբերությունները: ԱՄՆ-ը ցանկանում է, որպեսզի Վրաստանն անդամակցի ՆԱՏՕ-ին: Ռուսաստանը սատարում է Վրաստանից անջատ Հարավային Օսիայի և Աբխազիայի անջատողական շարժումներին:
Դմիտրի Մեդվեդևն ասել է, որ կփորձի խթանել արդեն իսկ սերտ համագործակցությունը ԱՄՆ-ի հետ Բուշի պաշտոնավարության վերջին ամիսների ընթացքում: Նա իր համոզվածությունն է հայտնել առ այն, որ իրեն կհաջողվի բարիդրացիական հարաբերություններ հաստատել ԱՄՆ-ի հաջորդ նախագահի հետ:
Հոդվածը ուղարկել
Տպագիր տարբերակ
