Միավորված ազգերի կազմակերպությունից մարդու իրավունքների խախտումների հետաքննման երկու պատասխանատուներ իրենց մտահոգությունն են հայտնել Իրանի վարչակարգի կողմից կանանց իրավունքների պաշտպանության ջատագովների հանդեպ իրականացվող ճնշումների շուրջ:
Մարդու իրավունքների պաշտպանների իրավադրության հարցերով հատուկ զեկուցագիր Մարգարետ Սեկեգիան և Կանանց նկատմամբ բռնությունների հարցերով հատուկ զեկուցագիր Յակին Էրթուրքը համատեղ հայտարարությամբ են հանդես եկել առ այն, որ “Վերջին երկու տարիների ընթացքում կանանց իրավունքների պաշտպանության ջատագովների դրությունը հետզհետե առավել խրթին է դարձել, իսկ իրենց ոչ բռնի գործողությունների նկատմամբ հետապնդումը խստացել է:…Խաղաղ ցուցարարները ձերբակալվել են, կալանավորվել և հետապնդումների ենթարկվել. շատերը նույնիսկ ազատազրկվել են որոշակի ժամկետներով”:
Հետապնդումները հատկապես ուղղված են այն կանանց և տղամարդկանց, ովքեր ներգրավված են “Մեկ միլիոն ստորագրություն” քարոզարշավում, որի նպատակն է Իրանի ժողովրդին իրազեկել գենդերային խտրականություն խթանող օրենքների շուրջ և ստորագրահավաք կազմակերպել նման օրենքների վերացման նպատակով: Մարգարետ Սեկեգիան և Յակին Էրթուրքն ասում են, որ մինչ օրս “տասնութ հաղորդագրություն է ուղարկվել Իրանի իշխանություններին քարոզարշավին մասնակցած 70-ից ավելին իրավապաշտպանների իրավունքների ոտնահարման առնչությամբ:...Սակայն մինչ այժմ ընդամենը երեք պատասխան ենք ստացել Իրանի իշխանություններից”:
ՄԱԿ-ի հատուկ հարցերով զեկուցողների հայտարարությունը հաջորդեց ՄԱԿ-ի Գլխավոր քարտուղար Բան Կի Մունի զեկույցին, որտեղ նա քննադատում էր Իրանում մարդու իրավունքների ոտնահարումները, այդ թվում և կանանց իրավունքների պաշտպանների խաղաղ գործողությունների հետապնդումը:
Բացի այդ, մի շարք իրավապաշտպան կազմակերպություններ, այդ թվում` Հյուման Ռայթս Ուոթչը, Մարդու իրավունքների միջազգային ֆեդերացիան և Կանանց և զարգացման հարցերով ասիական ֆորումը, համատեղ հայտարարությամբ են հանդես եկել, որով հորդորել են Իրանի կառավարությանը վերջ դնել կանանց իրավունքների պաշտպանության ջատագովների նկատմամբ վարչակարգի հետապնդումներին և հարգել հավաքների ազատության իրավունքը, որն ամրագրված է Մարդու իրավունքների համընդհանուր հռչակագրում և Քաղաքացիական և քաղաքական իրավունքների միջազգային դաշնագրում, որոնք Իրանը վավերացրել է:
ԱՄՆ-ը միանում է միջազգային համայնքի բարձրաձայնած մտահոգություններին և կոչ է անում Իրանի կառավարությանը վերջ տալ Իրանում իրավապաշտպանների` այդ թվում նաև կանանց իրավունքների պաշտպանության ջատագովների հանդեպ հետապնդումներին, ովքեր փորձում են կիրարկել իրենց համընդհանուր իրավունքներն ու ազատությունները:
E-mail
Տպագրել
