Ներկայումս տարածված թռչնագրիպի տեսակը մարդկանց մոտ առաջին անգամ արձանագրվել է 1997թ. Հոնկոնգում, այնուհետեւ Չինաստանի հիմնական տարածքում։  Այժմ  Հոնկոնգը, Չինաստանը եւ Տայվանը պատրաստվում են թռչնագրիպի համաճարակի, որը սպառնում է տասնյակ միլիոնավոր անձանց կյանքին ոչ միայն այդ տարածաշրջանում, այլ ողջ աշխարհում։

Փորձագետների կարծիքով, պետք է քննարկել ոչ թե ՚արդյոք՚, այլ ՛՛երբ՛՛ եւ ՛՛ինչպես՛՛ կտարածվի թռչնագրիպի համաճարակը մարդկանց շրջանում։  Նրանք ակնկալում են, որ վարակի մանրէն կվերափոխվի եւ արդյունքում անձից անձ կփոխանցվի։ Իրադարձությունների նման զարգացման դեպքում գործողությունների պատրաստ ծրագիր է անհրաժեշտ։

Չինաստանում թռչնագրիպի 18 դեպք է հաստատվել մարդկանց շրջանում։  Այժմ Չինաստանի բնակչությունը կազմում է 1.3 միլիարդից ավել։  Չինաստանում Առողջապահության հանաշխարհային կազմակերպության ներկայացուցիչ դոկտոր Հենք Բեկեդամի համաձայն՝ Չինաստանի տարածքն այնքան մեծ է, որ այն կարելի է որպես առանձին մայրցամաք որակել։  Նրա կարծիքով, թռչնագրիպի կանխարգելումը բարդագույն խնդիր է Չինաստանի համար՝ հաշվի առնելով երկրում մոտ 14 միլիարդ ընտանի թռչունների առկայությունը։

Դոկտոր Բեկեդամն ասում է, որ կարեւոր է հետեւել ընտանի թռչուններին թռչնաբուծարաններում, որտեղ վարակը տեղային է։  Նաեւ անհրաժեշտ է խստացնել կենդանիների վերահսկումը Չինաստանում։ Չինաստանի առողջապահության նախարարությունն արդեն իսկ խստացված կարգ է սահմանել կենդանի հավերի շուկաների համար եւ արգելել է կեդնանի հավերի վաճառքը խիտ բնակեցված տարածքներում։

Չինաստանի գյուղական տարածքները երկրի տնտեսական զարգացման գրավականն են։  Միեւնույն ժամանակ դրանք թռչնագրիպի դեմ պայքարի առաջնային ճակատն են։ Սակայն վարակի մասին տեղեկությունները կցկտուր են այնտեղ։

Հոնկոնգն աշխարհի ամենախիտ բնակեցված քաղաքն է՝ յուրաքանչյուր 1000 կմ մոտ 7 միլիոն բնակչությամբ։  Հոնկոնգի Հիվանդությունների կանխարգելման կենտրոնը խստորեն վերահսկում է շուկաները, օդափոխանակման համակարգերը եւ հետեւում է, որ շուկաները յուրաքանչյուր շաբաթ մաքրվեն։ Շփումը նվազեցնելու նպատակով քաղաքում նաեւ փորձարկվում է թռչնամսի առքուվաճառքի համար նախատեսված տարածքներն ապակե պատնեշներով առանձնացնելու գաղափարը։

Տայվանը  թռչնագրիպի կանխարգելման առանձին ծրագիր ունի։ Սա Ասիայի այն բազմաթիվ շրջաններից է, որտեղ թռչնագրիպի դեպք դեռեւս չի գրանցվել։ Կառավարությունը մի շարք քայլեր է նախաձեռնել վարակը կանխելու համար։ Ինչպես տեղեկացնում է հսկիչ Յինգ Յեն կառավարությունը թռչնագրիպի կանխարգելմանն ուղղված ջանքերը համակարգող հատուկ խորհուրդ է ստեղծել.

՛՛Անցյալ տարի մենք թռչնագրիպի տարածման նմանակում կազմակերպեցինք՝ յուրաքանչյուր համապատասխան վարչության պատրաստվածությունը գնահատելու նպատակով՛՛։

Ռոշ դեղագործական ընկերությունը համաձայնել է, որ վարակի տարածման դեպքում Տայվանում մասսայապես արտադրվի Թեմիֆլու կոչվող հակավարակային դեղամիջոցը։ Տայվանի Հիվանդությունների կանխարգելման կենտրոնի տնօրեն դոկտոր Յան Ժու Ժեն տեղեկացնում է, որ Տայվանն ու Չինաստանի հիմնական տարածքն այժմ վարակի վերաբերյալ տեղեկատվություն են փոխանակում.

՛՛Այժմ ոչ կառավարական կազմակերպությունների ներկայացուցիչները պարբերաբար Չինաստանի հիմնական տարածք են ժամանում՝ ամենաթարմ տվյալներն ստանալու նպատակով։ Ընդամենը մի փոքր ժամանակ է հարկավոր փոխադարձ վստահություն ձեռք բերելու համար՛՛։

Տայվանը  պատվաստանյութի ուսումնասիրման եւ մշակման առանձին ծրագիր ունի։  Ակնկալվում է, որ 2006թ. վերջին շուրջ 200,000 միավոր պատվաստանյութ կարտադրվի։

ԱՄՆ Գյուղատնտեսության դեպարտամենտը ներկայումս տարածված թռչնագրիպի մանրէն դասակարգում է որպես թռչնից-թռչուն փոխանցվող հիվանդություն։  Սակայն դա կարող է ցանկաչած պահի փոխվել։