Այս տարի Բոստոնի Բըրքլի երաժշտական քոլեջն ավարտեցին տեսախաղերի երաժշտություն գրելու մասնագիտացում ստացած առաջին շրջանավարտները:
Տեսախաղերը սովորաբար անցանկալի երևույթ են լսարաններում, սակայն Մայքլ Սվիթի ուսանողների համար դրանք պարտադիր են:
“Մի տարի է, ինչ տեսախաղերի համար երաժշտություն գրելու և ձայն դնելու վերաբերյալ նոր դասընթացներ և նյութեր ենք մշակում”, նշել է նա:
Մայքլ Սվիթի ուսանողները երաժտշության միջոցով սցենարն են զարգացնում, սակայն, ի տարբերություն ֆիլմերի, խաղերի համար բազմաթիվ տարբերակներ են անհրաժեշտ, քանի որ խաղացողն է թելադրում սյուժեի ընթացքը:
Ֆիլիպո Բեքփայքոզը Բըրքլիի շրջանավարտներից է: Նա խոսքերով` խաղի ռեժիսորն ըստ էության խաղացողն է: Երաժշտությունը, հետևաբար, պետք է միշտ այնպես համապատասխանի, կարծես այդ պահի համար է գրվել:
Երբ Ֆիլիպո Բեքփայքոզը նոր էր Իտալիայից ժամանել, Բըրքլիում այս ծրագիրը դեռևս չկար: Այդպես նա հիմնադրեց Տեսախաղերի երաժշտական ակումբը, որի անդամների թիվը շուտով հասավ 300-ի:
“Անմիջապես շատերը հետաքրքրվեցին, քանի որ մենք ավելի շատ սովոր ենք ինտերակտիվ, քան` գծային երաժշտության: Դա պայմանավորված է նրանով, որ փոքր տարիքից բոլորս էլ շատ ենք տեսախաղերով զբաղվել”, պատմում է նա:
Ակումբին հաջողվեց համալսարանին ստիպել աշխատանքի վերցնել ինտերակտիվ հաղորդակցման միջոցների մասնագետի` Մայքլ Սվիթին:
Երաժշտության և տեխնոլոգիաների միջև կապը վաղուց է գնահատվում Բըրքլիում: Քըրթ Բիդերվուլֆը քսան տարի առաջ հիմնադրված երաժշտական սինթեզի ամբիոնի ղեկավարն է: Նրա ուսանողները նույնպես նախապատրաստվում են տեսախաղերի բնագավառի համար:
“Եթե, օրինակ, խաղը գիտաֆանտաստիկ է կամ տիեզերքում է տեղի ունենում, անհնարին է համապատասխան բնական ձայներ գտնել, դրանք պետք է սինթեզվեն”, մանրամասնում է Քըրթ Բիդերվուլֆը:
Վերջին տարիներին ավելի շատ տեսախաղեր են վաճառվում, քան` ֆիլմեր և երաժշտական սկավառակներ: Իսկ դրանցում տեղ գտած երաժշտությունն առավել մեծ ճանաչում է ստանում:
Նրա խոսքերով` տեսախաղերում օգտագործվում է բազմաժանր երաժշտություն: Լինում են նաև դասական երաժշտությունից սկիզբ առնող հրաշալի նվագախմբային հատվածներ: Շատ նվագախմբեր, երիտասարդներին գրավելու նպատակով, նույնիսկ տեսախաղերից վերցրած երաժշստություն են նվագում:
Բըրքլին նաև իր սեփական Տեսախաղերի նվագախումբն ունի, որը միայն տեսախաղերում տեղ գտած հատվածներ է նվագում: Այն նույնպես ստեղծվել է ակումբի շրջանակներում և բացառապես ուսանողների ջանքերով:
E-mail
Տպագրել
