Քանի դեռ Ռուսաստանի ու ԱՄՆ-ի նախագահներ Դմիտրի Մեդվեդեւը եւ Բարաք Օբաման պատրաստվում են հուլիսի 6-ին հանդիպել Մոսկվայում, վերլուծաբանները ենթադրություններ են անում, թե արդյոք կիրականանան Ռուսաստանի հետ հարաբերությունները նորովի սկսելու Օբամայի հույսերը։ Նպատակ, որը նախ արտահայտվեց ԱՄՆ-ի արտգործնախարար Հիլարի Քլինթընի կողմից այս տարեսկզբին իր ռուս պաշտոնակցին հղված ուղերձով։
Ինչպես Ամերիկյան առաջընթաց կենտրոնի վերլուծաբան Սեմուել Չարափն է ասում, շատերն այդ օրն այն տպավորությունը ստացան, թե ինչ որ ձեւով ԱՄՆ-ը հանձնվում է, կամ ցանկանում մոռանալ Ռուսաստանի հետ անցյալի լարված հարաբերություններն ու դրանք ծնած պատճառները։ Իրականում թունավոր մթնոլորտը բարելավելու նպատակ կա, ասում է նա։
Իսկ թունավոր մթնոլորտի գլխավոր պատճառներն են անցյալ տարի ամռանը ռուսական ուժերի կողմից Վրաստանի տարածքներ իրականացրած ներխուժումը եւ Եւրոպայում հակահրթիռային պաշտպանական համակարգ ստեղծելու ԱՄՆ-ի ծրագրերը։
Ի դեպ երկու կողմերում են առկա հարաբերությունները մեղմելու հակումներ ու այդ հակումների խորությունը պիտի երեւա նրանց հանդիպման հենց առաջին օրը, երբ քննարկեն ռազմավարական զենքերը կրճատելու մասին Ստարտ մեկ պայմանագիրը նորացնելու հարցը։ Իսկ այն նորացնելու պատրաստակամություն կողմերը հայտնել են դեռեւս լոնդոնյան հանդիպման ժամանակ։
ԱՄՆ-ի Հարվարդի համալսարանի միջազգային հարաբերությունների հարցերով վերլուծաբան Սիմոն Սարաջյանը գտնում է, որ Ստարտ մեկի մասին Օբամայի ու Մեդվեդեւի ամեն մի արտահայտություն հստակ կերպով ցույց կտա, թե արդյոք կողմերը պատրաստ են զենքերը վերահսկելու հարցերից կենտրոնանալ կարեւոր այլ բնագավառների վրա, թե՝ ոչ։
Սակայն կա կարծիք նաեւ, որ այլ բնագավառների վրա կենտրոնանալու ճանապարհին կան այլ խոչընդոտներ եւս։ Դրանց թվում է Իրանի ու այս երկրի միջուկային ծրագրերի նկատմամբ Մոսկվայի դրական դիրքորոշումը։
Հուլիսվեցյան գագաթաժողովից իր ակնկալիքներում Վաշինգտոնը գուցեեւ սխալվում է, կամ պարզապես չափազանցնում է իր սպասելիքները, ասում են վերլուծաբաններից շատերը։ Սեմուել Չարափի խոսքերով, այս հանդիպումը չի ունենալու բեկումնային մեծ պահ։ Ռուսաստանը շարունակում է մնալ ԱՄՆ-ի դժվար գործընկերը եւ երկու երկրների միջեւ հարաբերությունները միշտ են կազմված լինելու մրցակցության եւ համագործակցության խառնուրդով։
Վաշինգտոնի ու Մոսկվայի միջեւ հնչող ձայներանգը մեղմ բնույթ ստացավ Օբամայի կողմից Սպիտակ տուն մուտք գործելուց ի վեր, սակայն հարկավոր է, որ հաշտվողական խոսքերը փոխարինվեն գործնական հարաբերությունների մեղմությամբ։
![[insert caption here]](/armenian/images/111.JPG "[insert caption here]")
E-mail
Տպագրել
