İlin Milli Müəllimi adını almış  Oreqon ştatının Prinvill  şəhərindəki orta məktəb müəllimi Maykl Qeysen əcnəbi dilli tələbələrə dərs demək istəyir. Ona mükafat  Ştat Məktəbləri Şurasının İlin Müəllimi Proqramı əsasında verilib. Şura 1952-ci ildən bəri Amerikada ilin müəllimini seçir. 
Maykl Qeysenin 35 yaşı var. Əvvəllər o, meşəbəyi idi. Lakin sonra o, təhsil sahəsində Magistraturanı qurtararaq yaşadığı Kruk mahalının  orta məktəbində işləməyə başlayıb.
Kruk mahalının  belə yüksək dərəcəli insanlara ehtiyacı var idi. O, öz  gəlişi ilə bu elm ocağına yeni enerji gətirdi. Maykl çalışdığı məktəbdəki şagirdlərin valideynlərinin də uşaqları ilə birlikdə fəaliyyət göstərmələri üçün özünün  yeni layihəsini hazırladı.
Onun sinfində olan şagirdlərdən biri deyir ki, müəllimin  sinifdə otun necə yetişdiyini nümayiş etdirməsi şagirdlər üçün maraqlıdır. Tənəffüs zamanı şagirdlər  söhbət etmək, hansısa məsləhəti almaq, bəzən də onunla birlikdə gitara çalmaq üçün müəllimləri Maykl Qeysenin otağına  gəlirlər. O, tələbələri yaradıcı olmağa yönəldir və dərsliklərdən çox praktikaya üstünlük verir.  Maykl söyləyir ki, şagirdlər dərsin öz həyatlarına və icmalarına təsir göstərə bildiyini görəndə  onların məktəbə və dərslərə marağı artır.

İki uşaq atası Maykl Qeysen aldığı ünvanla  təhsil üzrə sözçü kimi iyun ayının birində  fəaliyyətə başlayacaq, ölkəni və dünyanı  dolaşacaq.
Keçən həftə  prezident Corc Buş Ağ Evdə ölkənin ən yüksək səviyyəli müəllimlərinə mükafatlar verdi. O, Maykl Qeysenin fəaliyyətlərindən, onun başçılıq etdiyi təhsil ocağındakı ilk iki ildə gördüyü işlərdən danışdı. Onun proqramının həyata keçməsi ilə  Mayklın məktəbində tələbələrin texniki fənlər üzrə aldığı qiymətlər  xeyli yüksəldi.
İlin Müəllimi Maykl Qeysen Ağ Evdəki çıxışında  dedi ki, tələbələr təkcə ölçüləsi rəqəmlər deyil. O, qeyd etdi ki, tələbələrin yaradıcılığına, arzularına da önəm verilməli, onların  biliyi həyata  tətbiq etmələrinə imkan yaradılmalıdır.