ایرانین خارجی ایشلر وزیرلییی آمریکا ایله عراق حاقدا باشقا بیر دانیشیق توپلانتی‌سینی رد ائدیب. دوشنبه گونو، مه آیی‌نین 5-ی، ایران اسلام جمهوریتی‌نین سؤزچوسو محمدعلی حسینی آمریکا ایله عراقلا باغلی دانشیق حاقدا سواللاری جوابلادی و دئدی کی، " بیزه گؤره و ایندیکی شرایطه باخاراق بو دانیشیقلارین هئچ بیر نتیجه‌سی اولمایاجاق و بیر معنا دا تاپا بیلمه‌یه‌جک."

حسینی بیر خبر کنفرانسیندا ایدی. او اسلام جمهوریتی‌نین بو تصمیمی حاقدا دئدی کی، "بیزیم آمریکا ایله دانیشیقلاریمیزین آنا محوری عراقداکی امنیت و ثبات اولوب. اما ایندی بیزیم گؤردویوموز اشغالچی قووه‌لرین بو ملتی آشکارجاسینا بمبالاماسی‌دیر."

بو ایلک دفعه‌دیر کی اسلام جمهوریتی آمریکا ایله عراق حاقدا دانیشیقلاری رسما رد ائدیر.

کئچن آیین اول‌لرینده، ایرانین خارجی ایشلر وزارتی  آمریکا طرفیندن دانیشیقلار اوچون باشقا بیر تکلیف آلدیغینی اعلان ائتمیشدی، اما دانیشیقلار اوچون بللی بیر تاریخ تعیین ائتمه‌میشدی.

کئچن هفته‌لرده آمریکا و عراق قووه‌لری مهدی اوردوسونون یاراقلیلاری علیه‌ینه بصره‌ده و بغدادین صدر محله‌سینده  عملیاتلار دوزنله‌یبلر.

عراق دولتی مهدی اوردوسو ایله قارشی دورماقلا حکومتی تثبت ائتمه‌یه چالیشیر. بو برنامه باشاریلی اولسا اونو باشقا یاراقلی گروهلارا دا اویغولایاجاقلاری گؤزله‌نیلیر.

یکشنبه گونو عراق دولتی‌نین سؤزچوسو دئدی کی، شیعه یاراقلی‌لارینی کنترل ائتمه‌یه چالیشان عملیاتلار دوام ائده‌جک. او ائله‌جه‌ده آرتیردی کی، ایرانین یاراقلی‌لارا اسلحه یئتیرمه‌سینه دایر هئچ بیر سند الده دئییل.

آرتیرمالییق کی، محمد علی حسینی، ایران دولتی‌نین سؤزچوسو، مقتدی صدرین ایراندا اولماسی ایله باغلی، صدرین نجف‌ده‌کی دفتری‌نین بو خبری تکذیب ائتدیینی دئییب.