لبنان حزب‌اللهی‌نین یاراقلی‌لاری بیروت شهری‌نین غرب طرفی‌نین کنترولونو اله کئچیره‌رک دولت طرفدارلارینی شهرین بو بؤلوموندن ائشییه چیخاردی.

حزب‌الله و دولت مخالفی شیعه ائتلافینا باغلی یاراقلی‌لار کئچن گئجه‌کی چاتیشمالاردا بیروتون غربینی اؤز کنتروللارینا آلدیلار. بو قسمت‌ده ان چوخ مسلمانلار یاشاییر. اونلار دولت حمایت‌ینده‌کی سنی ائتلافی‌ین بعضی دفترلرینی داغیتدیلار و بیر سیرا دولت طرفداری مطبوعاتلاری منطقه‌ده باغلی اعلان ائتدیلر. لبنان اوردوسو بینالاری قوروماق اوچون منطقه‌یه گؤنده‌ریلیب، اما حزب‌لله یاراقلی‌لاری ایله درگیر اولماقدان چکینیر.

 بیروتداکی سون چاتیشمالار دوشنبه گونو لبنان دولتی‌نین حزب‌الله مخابرات شبکه‌سینی باغلاماسیندان سونرا باشلادی. چاتیشمادا 11 نفر حیاتینی ایتیردی، بیر چوخ انسان دا یارالاندی. ئولنلر سیویل خالق‌دیرلار. بیرلشمیش ملت‌لر تشکیلاتی هر ایکی طرفدن چاتیشمالارا سون قویمالارینی ایسته‌دی.

لبنان 1975-دن 1990-ا قدر ایچ ساواشینا شاهید ایدی. بو ساواش سوریه و اسرائیلین مستقیم دخالتینه سبب اولموشدو. یئنه‌ده سون چاتیشمالارین بیروتدا ایچ ساواشی یاراتماسی قورخوسو وار. تحلیل‌چیلرین دئدیینه گؤره، ایچ ساواشا مانع اولماغین آچاری، لبنان اوردوسونون چاتیشمالارا قاتیلماماسی‌دیر.

سون ایللرده لبنان اوردوسو لبنانداکی طرفسیز قورولوشلاردان بیری اولوب. اما خبرنگارلار دئییرلر کی، رقیب حزبلر آراسینداکی سون چاتیشمالار اوردونون بیرلیینی داغیدیب، چاتیشمالارا قاتا بیلر.