برمهدهکی نظامی دولت نرگیس قاسیرغاسی سونراسی خارجی یاردیم و آراشدیرما اکیبلرینی قبول ائتمه یه حاضیر اولمادیغینی بیلدیردی. خارجی ایشلر وزارتی بیلدیردی کی، برمه خارجی یاردیم ایستهییر، اما بو یاردیملارین وطنداشلار آراسیندا پایلانماسی برمه حکومتینه وئریلمهلیدیر.
دولتین کنترولونداکی بیر روزنامه، دونن رانگونا گلن یاردیم چالیشانلاری و ژورنالیستلرین برمه مرزلریندن چیخاریلدیقلارینی یازدی. بیرلشمیش ملتلر تشکیلاتینین دبیرکللو بان کی مون برمهدهکی نظامی دولتدن ایستهدی کی، بو هفته آنایاسا رفراندومو دوزنلهمک یئرینه، نرگیس قاسیرغاسیندان ضرر گؤرنلره یاردیم چاتدیرماغا چالیشسین.
بیرلشمیش ملتلر تشکیلاتی، قاسیرغادان بیرمیلیون یاریم انسانین ضرر گؤردویونو تخمین ائدیر و برمه رسمیلریندن بینالخالق یاردیملارا قویدوقلاری محدودیتلری قالدیرمالارینی ایستهییر.
بو آرادا یاردیم هدفی ایله حربی طیارهلرینین ئولکهیه گیرمهسینه اجازه وئریلمهین آمریکادان بیر رسمی، فلاکت منطقهسینه هاوادان یاردیم آتمادیغی دوشوندوکلرینی دئدی.
برمه دولت مطبوعاتی ایسه نرگیس قاسیرغاسیندان 22.980 نفرین ئولدویونو اما رقمین 100مینه چیخا بیلمهسیندن قورخدوغونو بیلدیردی. برمهده بیرمیلیونا یاخین انسانین ائوسیز قالدیغی تخمین ائدیلیر. نرگس قاسیرغاسیندان بئش گون سونرا بیرلشمیش ملتلر تشکیلاتی دونن ایلک یاردیم طیارهسینی منطقهیه چاتدیرا بیلدی.
انترنت دن پروگراملار
بو مقاله نی ای ميل ائدين
چاپ اوچون متن
