عراق اوردوسو ئولکه‌نین قوزئی‌ینده‌کی موصل شهرینده القائده‌نین علیه‌ینه بؤیوک بیر عملیات باشلاتدیغینی دئییر. "آسلان نعره‌سی" آدلانان بو عملیاتا عراق و آمریکا قووه‌لریندن باشقا دولته وفالی عرب سنی طایفالاری دا قوشولوبلار. موصل‌ده کوچه‌یه چیخماغا قاداغا قویولوب و عراق‌داکی بیر نئچه القائده رهبری‌نین توتوقلانما حکمو وئریلیب. عراق دولتی موصل‌ین القائده‌یه سون سیغناق اولدوغونو دوشونور.

 نوری مالکی القائده‌نی عراقدان چیخارماغا بؤیوک امیدلر بسله‌ییر. عراق اوردوسونون نینواداکی باشچیسی ژنرال جلال توفیق بو عملیاتین عراقدا‌کی القائده‌نی هدف آلاجاغینی قید ائده‌رک بؤلگه‌ده‌کی دینی رهبرلردن و طایفا باشچیلاریندان بو عملیاتلارا آرخا دورماغی ایسته‌یییب.

هله‌لیک نه تعداد عراق عسکری‌نین عملیاتا قاتیلاجاغی حاقدا بیلگی وئریلمه‌ییب، اما شاهیدلر آمریکا ساواش طیاره‌لری‌نین موصل گؤیلرینده گؤروندویونو دئییرلر.

موصلی القائده‌دن تمیزله‌مک تصمیمی ژانویه آییندا نوری المالکی طرفیندن توتولوب. موصل عراقین اوچونجو بؤیوک شهری‌دیر.