ایران آمریکا و اسرائیلی لبناندا آیریلیق یاراتماقدا متهم ائدیب، بو ایکی ئولکه‌نی لبنانی بحراندا ساخلاماقدا گوناهلاندیردی. ایران خارجی ایشلر وزارتی‌نین سؤزچوسو محمدعلی حسینی بوگون خبرنگارلارلا گؤروشونده دئدی کی، آمریکا و اسرائیل لبنان چاتیشمالارینی بو ئولکه‌نین مختلف مذهبلر و قوم‌لاری آراسیندا چاتیشما کیمی تانیتماغا چالیشیرلار.

بیروت فرودگاهی‌نین امنیب رئیسی لبنان دولتی طرفیندن ایشدن چیخاریلاندان سونرا، حزب‌الله و اونلارا باغلی قووه‌لر بیروتون غربینی اشغال ائتدیلر و مختلف گروهلار آراسینداکی چاتیشمالاردا 20 نفردن چوخ انسان حیاتینی ایتیردی.

آمریکا ایران و سوریه‌نی بو حادثه‌لرده گوناهلاندیریر. ایران دا آمریکا و اسرائیلین حادثه‌ده اللری اولدوغونو دئییر. ایرانا گؤره، لبنان بحرانی لبنانین ایچ مسئله‌سی‌دیر و لبنانداکی گروهلارلا سیاسی حزبلر بو بحرانی دانیشیق یولو ایله آرادان قالدیرمالی‌دیرلار. جناب حسینی تاکید ائدیب کی، ایران و عربستان لبنان حاقدا بیر سیرا دانیشیقلار کئچیریبلر و بو دانیشیقلارین یئنه‌ده دوامی وار.

ایران عمومیتله لبنان حزب‌اللهی‌نین طرفداری  ساییلیر. امل حرکتی و باشقا شیعه گروهلارین دا سوریه ایله یاخین علاقه‌لری وار. عربستان دا 14 مارس(لبنانداکی حاکم گروه)جریانی‌نین طرفداری‌دیر.