افغانستان مجلسینین اونلار نمایندهسینین اعتصابی بوگون، 35 گوندن سونرا، باشا چاتیب. بوتون نمایندهلر مجلس اوتورومونا قاتیلیبلار. بونمایندهلر، بیر کوچی نمایندهنین افغانستادا یاشایان باشقا ملتلره توهین ائدر شکیلده دانیشماسیندان سونرا اعتصابا باشلادیلار و مجلسه قاتیلماقدان امتناع ائتدیلر.
کوچیلرین مجلسدهکی نمایندهسی، علمگلخان، دئمیشدی کی، کوچیلر "افغانستانین اصیل وارثلری"دیرلر و باشقا قوملار "گلمه"دیرلر. افغانستان مجلسینین 100-ه یاخین نمایندهسی بو سؤزلره اعتراض اولاراق اعتصاب ائتدیلر و دئدیلر کی، علمگلخان عذر ایستهیهنه قدر اعتصابا دوام ائدهجکلر.
ایییرمینفرلیک مجلس نمایندهلری آنلاشما کمسیونو بیر بیانیهده اعلام ائدیبکی، اونلار "بیر نئچه اختلاف موضوعسو" حاقدا آنلاشیبلار. کمسیون علمگلخانین باشقا مجلس نمایندهلریندن عذر ایستهمهسی قرارینا چاتیب و دئییب کی، او عذر ایستهمهسه اونونلا انضباطی برخورد اولوناجاق.
داها ئونجه عذر ایستهمکدن چکینن علمگلخان بیانیه حاقدا هئچ بیر فیکیر سؤیلهمهییب.
مجلسده قاریشیقلیق نمایندهلرین سئچکی قانونلاری حاقدا دانیشدیقلاری زامان باش وئریب. بو قانونون بیر مادهسینده دئییلیر کی، کوچیلرین افغانستانین هر یئرینده رای صاندیقلاری اولماسینا حاقلاری وار. بو مادهیه بیر چوخ نماینده اعتراض ائدیبلر. مادهنین طرفدارلاری ایسه کوچیلرین همیشه کؤچده اولدوقلارینا گؤره هر یئرده رای صاندیقلاری اولماسینا حاقلاری وار دئییرلر. مخالفلر ایسه بونون، بوتون افغالیلار برابر حقوقا صاحبدبرلر دئین آنا یاسایا ضد اولدوغونو دوشونورلر.
انترنت دن پروگراملار
بو مقاله نی ای ميل ائدين
چاپ اوچون متن
