لبنان رسمی لرينين بيلديرديينه گوره ئولکه نين شيماليندا دويوشلر يئنیدن باش قالديريب. بازار ائرته سی گونو تريپولی- طرابلس شهرينده حزب الله چيلارلا حکومت قوه لری آراسيندا باش وئرميش سيلاحلی توققوشمالار دونن بيروت داغلاريندا "دروز" آزليغی نين ليدئری وليد جنبلاطين آداملاری و حزب الله چيلارآراسيندا باش وئرميش سيلاحلی قارشيدورما نتيجه سينده 11 آدامين ئولومونده سونرا باش وئريب.بونونلا دا سون 5 گونکو دويوشلر زامانی ئولن لرين سايی 58 نفره يوکسه ليب. قيد ائدک کی، حزب الله بيروت شهريندن چيخاراق کنترولو لبنان اردوسونا تحويل وئرسه ده بير سيرا يئرلرده حزب اللهين ياريمحربی پست لاری ييغيشيديريلماديغيندان بيروت هاوا ليمانی باغلی قاليب. لبنانين باش ناظری فواد سينيوره ايسه دئيير کی، حکومت کابينه سی حربی تکليف لرله باغلی قرار وئرمک مقصدی ايله بير آرايا گله جک. يادا سالاق کی، بيروتداکی دويوشلر حزب الله طرفداری اولان بيروت هاوا ليمانی تهلوکه سيزليک خدمتی نين باشچيسی نين ايشدن چيخارديلماسی و حزب اللهين قانونسوز رابطه سيستمی نين لغو ائديلمه سيندن سونرا باشلاييب.