چين حکومتی بوتون سعی لرينی اورتايا قوياراق بو ئولکه نين سيچوئان ايالتينی داغيتميش زلزله قوربانلارينا يارديم ائتمه يه چاليشير. چين باش ناظری وئون جيابو بولگه يه يوللانيب. چين يارديم گروهلاری اوچون ان آغیر و بيرينجی درجه لی ايش ايسه سيچوان ايالتی نين وئنچوئان بولگه سينه چاتماقدير. رسمی معلوماتلارا گوره ئولو سايی 12 مين نفری اشيب و بو رقمين گئت- گئده آرتماسی گوزله نيلير. باش ناظر جيابو قاپانميش يوللارين تميزلنمه سينی امر ائديب. اونون دئديينه گوره تورپاق سوروشمه لری و داغينتی لار نتيجه سينده يوللارين باغلانيلماسی و داواملی ياغينتی لار قورتارما عملياتلارين جدی اولاراق چتين لشديرير. بازار ائرته سی گونو باش ناظر 900 شاگيردين داغينتی لار التيندا قالديغی مدرسه يه گله رک قورتارما عملياتلارينا بير- باشا نظارت ائديب. وئنچوان شهرينين ساکين لری ايسه هر طرفلی قارغيميش دورومداديرلار. بئله کی، شهرين بوتون علاقه سی - ايليشگی سی ائشيک دونيا ايله کسيليب. 110 مين اهالی سی اولان بو شهرين کمونيست پارتياسی نين باشچيسی وانگ بين زلزله دن 11 ساعات سونرا بير ماهواره تلفونو ايله يارديم چاغيرا بيليب. آنجاق امداد گروهلار هله ده ئوزلرينی شهره چاتديرا بيلمه ييب. يوللار باغلی اولدوغوندان امدادچيلار و چين اردوسو ئوزونو يئريه رک شهره چاتديرماغا چاليشير. گوجلو يئل لره و توفانا گوره هاوادان يارديم چاتديرماق دا امکان سيزدير. چينين ايکی حربی گمی سی بو شهره سو سدی آرخاسيندان ال چاتديرماغا چاليشير. چين-ين ساغلامليق رسمی لری ايسه بولگه ده کی ياراليلارا يارديم ائتمکله ياناشی بولگه نين ديزينفکسيون( ضد عفونی) ائديلمه سی ده حياتا کئچيريلير. يادا سالاق کی، بو 250 مين نفرين ئولومو ايله نتيجه له نن 1970-جی ايل زلزله سيندن بری چينده باش وئرميش ان آغير طبيعی فلاکت ساييلير.