پرزيدنت جورج بوش اوتا شرقه 5 گونلوک سفرينين ايلک داياناجاغی(ايستگاه) اولان اسرائيله چاتيب. اسرائيل دولتی نين قورولماسينين 60 ايل لييی عرفه سينده باش توتان سفره گلن بوش، تل آويوين بن گورين هاوا ليمانيندا اسرائيل پرزيدنتی شيمون پرز و باش وزيری ايهود اولمرت طرفيندن قارشيلانيب. بو پرزيدنت بوشون سون بير ايلده اسرائيله ايکينجی سفری دير. جناب اولمرت دئييب کی، آمريکا هر زامان و بوتون شرط لرله گنج اسرائيل دولتی نين يانيندا اولوب. او پرزيدنت بوشون 8 ايل قاباق حاکميته گلمه سيندن بو گونه دک هر زامان اسرائيلين ان ياخين متفقی اولدوغونو سويله ييب. آمريکا پرزيدنتی دئييب کی، اسرائيل و آمريکا دولت لرينين قورولماسی زامانی بير سيرا چتين ليک لر اورتايا چيخميشدير. او هر ايکی ئولکه نين اوغور قازانماسينا سبب اولان اوخشار اصوللاری پايلاشديغينی وورغولاييب. جناب بوش لا جناب اولمرت آراسينداکی ايکی طرفلی دانيشيقلار ايسه اورشليم- بيت المقدس شهرينده باشلاييب. دانيشيقلاراسرائيل- فلسطين مناقشه سينين حلی ايله باغلی اولوب. قيد ائدک کی، جناب بوشون اسرائيلدن سونرا مصرين شرم الشيخ شهرينه سفر ائده رک فلسطينين معتدل موقعلی پرزيدنتی محمود عباس لا دانيشيقلار آپاراجاغی پلانلاشديريليب. فلسطين ليلری پرزيدنت بوشون فلسطينه کئچن ژانويه ده اولدوغو کيمی سفر ائتمه مه سيندن ناراحات ديرلار.