لبناندا باش وئرن قارشيدورمالارين آرادان قالديريلماسی مقصدی ايله کئچيريلن عرب بيرلييی نين اجلاسی نين آردينجا بيرليک ئوز نماينده هياتينی لبنانا گونده ريب. يوکسک سويه لی رسمی لرين قاتيلديغی هيات لبنان حکومتی نين رسمی لری ايله ياناشی مخالف حزب الله تشکيلاتی ايله ده دانيشيقلار آپارير. لبنان حکومتی، آمريکا و عربستان ايران وسوريه نی سون قارشيدورمالارا گوره اتهام ائديرلر. آمريکانين ملی امنيت مشاوری استفان هدلی بيلديريب کی، آمريکا ايران و سوريه اوزه رينده کی تضييق لری داها دا آغيرلاشديرماغی پلانلاشديرير. هدلی باشقا اورتا شرق ئولکه لرينی ده عينی آدديملا آتماغا چاغيريب. اونون دئديينه گوره لبنانداکی عصيان لا باغلی مسئله گلن هفته ب م ت نين تهلوکه سيزليک شوراسينين توپلانتی سينين مذاکره موضوعسو اولاجاق. عربستانين خارجی ايشلرناظری نين اتهاملارينا جواب وئرن ايران پرزيدنتی احمدی نژاد ايرانين لبنانين ايچ ايشلرينه قاريشمايان تکجه ئولکه اولدوغونو دئييب. لبنان پارلمانينداکی چوخلوغون ليدئری سعد الحريری ايسه لبنانين حزب الله و اونون آرخاسيندا دورانلارا هئچ واخت تسليم اولماياجاغينا سوز وئريب. يادا سالاق کی، بيروت هاوا ليمانی نين امنيت باشچی سينين ايشدن چيخاريلماسی و حزب اللهين ارتيباط شبکه سينين قانونسوز اعلان ائديلمه سيندن سونرا حزب الله دويوشچولری بيروت کوچه لرينده حکومت قوه لری ايله دويوشلره باشلاديلار.. نتيجه ده 62 نفر ئولوب 200 آدام يارالانيب. حکومتين بيلديرديينه گوره بيروت هاوا ليمانيندا حزب اللهين قوردوغو گيزلی دوربين لر حکومت آداملارينين سفرلرينی و حرکت لرينی ايزله ييرميش.