چين يارديم گروهلاری بو ئولکه نين سيچوان ئولکه سينين زلزله نتيجه سينده داغينتی لار آلتيندا قالان 3 داغليق بولگه سينه چاتماق اوچون ال لريندن گلنی ائديرلر. چين رسمی لری ايسه اعلان اولونموش 15000 ئولو سايی نين قات- قات آتاجاغيندان و 50000 نفره چاتاجاغيندان احتياطلانديقلارينی بيلديرير. چين اردوسو داها چوخ سايلی عسگر و داها چوخ سايلی هليکوپترلری بولگه يه گوندرمکله قورتارما چاليشمالارينی سرعت لنديرمه يه چاليشير. ان سون معلوماتا گوره چين هليکوپترلری پاراشوتلار- چتيرلرله ال چاتماز بولگه لره دوشورلر. چين تلويزيونو باش ناظر وئن جيابونون حادثه يئرينده اولدوغونو، زلزله دن اذيت چکن لرله دانيشديغينی، يئرلی و خارجی يارديم گروهلارينی تشويق ائتديينی گوستريب. رسمی معلوماتلارا گوره تورپاق سوروشمه سی هله ده ايليشيب قالان 20 مين ليک ياشاييش بولگه لرينه ال يئتيرمه يه مانع اولور.يوز مين لرله انسان ائوسيز قالديغيندان بونونلا ياناشی زلزله دن قورتارانلارين يئرلشديريلمه سی چين حکومتی نين اساس چتين ليينه چئوريليب. رسمی لری همده 400 دن چوخ  سو سدينين خسارت گورديونو  و بونو ناراحاتليق ياراتديغينی بيلديرير. چين حکومتی نين اينديه دک 150 ميليون دلار خرجله دييی بيلديريلير. چين رسمی لری عمومی يارديم لارين 120 ميليون دلارا چاتديغينی دا بيان ائدير.