قيرميزی خاچ(قيرميزی صليب) بيلديرير کی، قارشيدان گلن بير نئچه گون ايچينده باش وئره جک داواملی ياغينتی لار اونسوز دا چاره سيزليک ايچينده اولان برمه نين فلاکت وورموش انسانلارينا علاوه آغيرليق لار يارادا بيلر. بانکوکداکی قيرميزی خاچين نماينده لييندن بيلديريلير کی، موسوم ياغيش لاری برمه ده يئنی سيل سولارينين داشماسينا سبب اولا و قورتارما عملياتلارينی داها دا زورلاشديرا بيلر. ب م ت و باشقا بين الخالق يارديم تشکيلاتلاری مايين 2-باش وئرميش سايکلون قاسيرغاسيندان ئولن لرين سايی نين 100 مين لرله ئولچوله جه ييندن ناراحات ديرلار. بين الخالق قوروملارين بيلديرديينه گوره برمه ده 2.5 ميليون انسانين ايلکين يارديم لارا احتياجی وار. قيرميزی خاچين تايلند نماينده سی جوانا مکلين دئيير کی، يارديم تشکيلاتلاری و قورتارما اکيپ لرينين بولگه يه ال يئتشيديرمک يوللاری آچيلمالی دير. او يارديم اوچون داها چوخ کونوللولرين لازيم اولدوغونو دا علاوه ائديب. برمه نين حربی حکومتی دولت چئوريليشی قورخوسوندان بير چوخ بين الخالق قوروملارين امکداشلارينا ئولکه يه گيرمه يه اجازه وئرمير.