آنتی حزب الله قراری حزب الله چيلارين کوچه ساواشلارينا ، 60 آدامين ئولو و 200 نفرين يارالانماسی ايله نتيجه لنمه سيندن سونرا لبنان حکومتی آنتی حزب الله قرارينی ده ييشديريب. حکومت حزب اللهه قارشی قبول ائتدييی ايکی قراری ده ييشديرديکدن سونرا حزب اللهين بيروتداکی قرارگاهيندا سئوينجدن هاوايا آتش لر آچيليب. اطلاعات ناظری قاضی العريدی حکومتين قرارينی اوخويوب. اونو بيلديرديينه گوره حکومت لبنان اردوسونون قراری ايله راضيلاشاراق بوندان ئونجه چيخارتديغی ايکی قرارينی ده ييشمه يه قرار وئريب. قيد ائدک کی، حکومت حزب اللهين رابطه سيستمی- موبايل شبکه سی نين لغوی و حزب الله چی بيروت هاوا ليمانی نين تهلوکه سيزليک باشچيسينين ايشدن چيخاريلماسينا قرار وئرميشدی. حزب الله رهبری حکومتين اولکی قرارلارينی حزب اللها قارشی ساواش اعلانی اولاراق ده يرلنديرديينی بيلديرميشدی. العريدی دئييب کی، حکومت يالنيز داها اوستون اولان ملی منافع نامينه ئوز قرارلارينی ده ييشديريب. بيلديريلديينه گوره حکومت کابينه سينين مسئله ايله باغلی مذاکره لری 5 ساعات زامان آپاريب. يادا سالاق کی، حزب الله طرفدارلاری اولان حکومت نماينده لری 2006- جی ايلدن حکومتدن آيريليب لار. اونلار حکومتين ايسته نيلن قرارينا قارشی وتو حاققی اولان اوستونلويه يييه لنمه يه چاليشير.