مای قيامی زامانی ئولدورلن سولدوز جوانلاری نين مزارلاری

 ئويرنجی.کام، آذر نيوز و سولدوز خبرين يايديغی معلوماتا گوره ايران رژيمی نين اوزون مدت ئونجه آدينی ده ييشه رک نقده يه چئوردييی سولدوزدا يئرلشن يئددی گوز داغ و استراحت بولگه سينين آدی دا ده ييشديريليب. شهر شوراسينين قرارينا گوره يئددی گوزون آدی عينی ايله فارسجايا ترجوما اولوناراق "هفت چشمه" آدلانديريليب. يئددی گوزون آدينين فارسلاشديريلماسی ايله باغلی اعلاميه لر گئنيش شکيلده شهرده ياييليب. يادا سالاق کی، سولدوزون گادار چايی "قادر رود"، آغ تووله سی" عطاالله" داش دورگه سی" دورگه سنگ" کيمی فارس آدلارلا ده ييشديليب. بونا اعتراض مقصدی ايله  شهرده بو يئرين آدينين يئددی گوزل اولاراق قالاجاغينا تاکيد ائدن ورقه لر ياييلديغی سويله نيلير.بو آرادا شولدوز شهرينين آذربايجان مئيدانی نين ده ييشديريلمه سی نين ده پلانلاشديريلديغی بيلديريلير. اونو دا قيد ائدک کی، فارس ميليت چيلييی اساسيندا ايران دولتی نين قورولدوغو سون 80 ايلدن بری آذربايجانا قارشی آپاريلان فارسلاشديريلما سياستی يونونده  آذربايجان تورکجه سينده تحصيل، نشريات وتصوير لی مئديالارا قاداغا قويولوب. يئر، شهر، کند، داغ، دره و… آدلاری ايسه فارسجا ترجومه لری  و يا تحريف اولونموش واريانتلاری ايله عوضله نير. اونو دا قيد ائدک کی، آذربايجانچيلارا قارشی تضييق لرين داوامی چرچيوه سينده 16 ياشلی تبريزلی مدرسه اوشاغی  محمد رضاعوض پورون 6 آی  آزادليقدان محروم ائديلمه سی حاقدا قرار وئريليب.