عرب تلويزيون کانال لاريندان اولان العربيه نين معلوماتينا گوره ايرانين جنوب شرقينده 16 پليس مامورونو گيرولوقدا ساخلايان جندالله ياراقليلاری گيرولاردان ايکيسينی ئولدوروبلر. العربيه ايکی پليسين ديزه چوکدويونو و گوزلرينين باغلانديغينی جندالله تشکيلاتی نين يايديغی ويدئونو گوستريب. قوروم هده له يه رک بيلديرميشدی کی، حبس اولونموش سنی فعال لار آزاد ائديلمزسه گيرولارين اعدامينا باشلاياجاق. بو تشکيلات ايستک لرينين يئرينه يئتيريلمه سی اوچون تهران رژيمينه بو گونه دک مهلت وئرميشدی. ايران جندالله تشکيلاتينی القائده ايله باغلاسا دا تشکيلات ئوزونو مقاومت حرکاتی آدلانديرير و ايرانداکی بلوچلارا قارشی ايری سئچکي ليک لرين عليهينه مبارزه آپاران ملی آزادليق تشکيلاتی اولدوغونو بيلديرير. بو تشکيلات ايراندا بير نئچه ترور عملياتی او جومله دن 11 پاسدارين ئولومونه سبب اولان اتوبوسون پارتلاديلماسينی حياتا کئچيرميشدی.