ایران اوردوسونون 4 ایشچیسی ئولکه‌نین غربینده‌کی قصرشیرین شهرینده مینه چارپیلاراق حیاتلارینی ایتیردیلر، بیر نفر ایسه یارالاندی. ایران اؤیرنجی‌لری خبر مرکزی ایرنانین دئدیینه گؤره، قصرشیرین شهری‌نین فرمانداری بو 5 نفرین کرمانشاهداکی 81 زرهی لشکرینه عاید اولدوقلارینی دئییب. بهنام تیموری آرتیریب کی، بو 5 نفر تیر آیی‌نین 15-ینده ایش باشیندا ایکن خان‌لیلی پاسگاهی‌نین 500 متیرلیینده، قصرشیرین و سومار آراسیندا مینه چارپیلیبلار.

5 نفردن ایکیسی یئرینده‌جه ئولوب. ایکی نفر ایسه بیمارستانا آپاریلاندان سونرا حیاتلارینی ایتیریب. بیر باشقا عسکر ده آغیر یارالانیب.

قصرشیرین فرمانداری کئچن بیر آیدا شهرده بیر نئچه مورد مینه چارپیلماق خبری وئریلدیینه اشاره ائدیب.

 ایشدن سالینمامیش مینلر 80-اینجی ایللرده‌کی ایران-عراق ساواشی زامانینا عایددیر. وئریلن بعضی بیلگی‌لره اساسا،  ایران اَن چوخ  ایشدن سالینمامیش مینلری اولان ئولکه‌لر آراسیندا یئر آلیر.

ایران-عراق ساواشیندان 19 ایل کئچمه‌سینه باخمایاراق ئولکه‌ده  آزی "بیر میلیون هکتار" مینله دولو یئر وار. ایرانلی رسمی‌لر یاخین گله‌جکده بو بؤلگه‌لرین تمیزله‌نه‌جه‌یینی دئییرلر.