دونيانين ان گوجلو  و صنايع لشميش ئولکه لريندن عبارت  جی 8 لرين ليدئرلری ژاپونون هوکايدو آداسيندا بير آرايا گليب. ژاپون باش وزيری ياسوو فوکودا بريتانيا، آمريکا، کانادا، فرانسه، آلمان، ايتاليا و روسيا رهبرلرينه خوش گلدين دئديکدن سونرا اجلاس رسما ايشينه باشلاييب. جی 8 لرين ليدئرلری آفريقا رهبرلری ايله گون اورتا يئمک ماساسيندا بو قاره ده يوخسول لوغون آرادان قالديريلماسی سعی لرينی مذاکره ائديبلر. توپلانتی نين باشلانماسيندان قاباق ايسه اروپا کميسيونونون پرزيدنتی خوزه مانوئل باروسو ايره ليله مکده اولان ئولکه لرين، ئوزل ليکله آفريقانين اکين چيليک ساحه سينه يارديم اوچون فوند(صندوق) ياراديلماسينی تکليف ائديب. او فوندون ماليه سينين 1.6 ميليارد دلارينين اروپانين استفاده ائديلمه ين اکين سوبسيدلريندن تامين ائديله جه يينی سويله ييب. بو آرادا، رسمی اجلاسدان ئونجه  آمريکا پرزيدنتی روسيه پرزيدنتی ديميتری مئدودوف-لا گوروشوب. ليدئرلر، تجارت،  اروپادا راکت لردن مدافعه سيستمی نين قوراشديريلماسی و ايران کيمی مسئله لری مذاکره ائديبلر. فرانسه پرزيدنتی نيکولاس سارکوزی ايسه ژاپونون "يورنيوری شيمبونگ" گونده ليينه(روزنامه) مصاحبه سينده دئييب کی، جی 8 لرين دونياداکی ارزاق بحرانی مسئله سينه باخاجاغی و ارزاق صادراتی ايله باغلی محدوديت لری آرادان قالديرماغا چاليشاجاغی گوزله نيلير.