آمريکانين خارجی ايشلر ناظرلييی نين باش مفتشی نين دئديينه گوره او عراق حکومتی ايله غرب نفت شرکت لری آراسيندا کی  قازانجلی نفت آنلاشمالاريندا ناظرليين محتمل رولونو آراشديرماقدادير. عراقين نفت قانونو اولماديغيندان آمريکا بو کيمی آنلاشمالاری دستکله مه ديينی سويله يير. باش مفتش هارولد گيسئل  آمريکا قانونوئريجی لرينه مکتوبوندا بيلديريب کی، او نفت آنلاشمالارينی، نفت ياتاقلاری و آمريکانين عراق سياستينی گوزدن کئچيرير. آنلاشمالارين آراشديريلماسی ايسته يی  آمريکالی سناتورلار چارلز شامئر، کارل لئوين، جان کئری و کلير مک کاسکيل طرفيندن ايره لی سورولوب. بو آيين اول لرينده آمريکا کنگره سينين کميته سی بيلديريب کی، آمريکانين خارجی ايشلر ناظرلييی نين رسمی لرينين عراقين مختار کوردوستان اداره چيلری ايله آمريکانين هانت اويل نفت شرکتی آراسيندا نفت مقاوله سی امضالاماسيندا الی اولا بيلر. خارجی ايشلر ناظرلييی ايسه بو اتهامی رد ائديب. يادا سالاق کی، شيعه، سنی و کورد ملت وکيل لرینين قارشيدورماسی نتيجه سينده عراق پارلمانی ئولکه نين نفت قانونو لايحه سينی تصديق ائده بيلمه ييب. يئرلی کورد حکومتی نفت قانونو قبول ائتسه ده مرکزی حکومت اونو قانونسوز ساييب.