ايندی  آمريکا حکومتی نين نظرينی عکس ائتديرن باش مقاله نی تقديم ائديريک

 آمريکا،اسرائيل، مصر و سعودی عربستانی داخيل اولماقلا، ياخين شرقين بير سيرا ئولکه لرينه حربی يارديم راضيليقلاری باره ده پلانی آچيقلاييب. خارجی ايشلر ناظری کانداليزا رايس   دئيير کی، بو پلان آمريکا بيرلشميش دولت لری نين  بولگه يه عنعنه حالينی آلميش يارديم عهده ليک لرينين بير حيصه سی دير. بوندان باشقا خانيم رايس بيلديريب کی، بو يارديم بولگه ده ده کی معتدل قوه لری دستکله مکله ياناشی، القاعده، حزب الله، سوريه و ايرانين منفی تاثيرينين قارشی سينی آلماغا يونه له جک.

 خانيم کانداليزا رايس  ايرانی، آمريکايا استراتژی جهت دن جدی چتين ليک لر  توره دن، ياخين شرقده آزادليق و ثابت ليين يارانماسی، ده ييشيک ليک لرين حياتا کئچيريلمه سينه مانعه توره دن بير فاکتور کيمی ده يرلنديريب.

 او دئييب کی، ايران حکومتی ترورچولوغو دستکله يير، لبناندا دموکراتيک قوه لره تهلوکه توره دير، فلسطين اراضی سينده راديکال قوه لری حيمايه، عراقداکی شيعه ياراقليلاری ايسه سلاحلارلا تجهيز ائدير، آمريکا عسگرلرينين حياتی و عراقين آزادليغينا تهلوکه توره دير. آمريکانين خارجی ايشلر ناظری ايران حکومتی نين اتم سلاحلارينين توليدی اوچون تکنولوژی لر الده ائتمک سعی لرينی جدی پرابلم آدلانديريب. خانيم رايس قيد ائديب کی، آمريکا و اونون متفقلری  ايرانين ميدان اوخوماسينا جاواب اولاراق بير سيرا ئولچولر ايره لی سوروب.

"ايلک ئونجه عراقدا ايرانليلارين فعاليت لريندن خبر الده ائتمه لی،  بيزيم ماراغيميز و خالقيميزا تهلوکه سی اولدوقدا بونون عليهينه چيخمالييق. بيز بولگه يه داير عهده ليک لريميزه باغلی اولدوغوموزو ثبوتا يئتيرمه لی ييک. بونلار کيسمه يه قارشی يوخ، بولگه ده ثابت ليين يارانماسينا يونه ليب." دئيه آمريکانين خارجی ايشلر وزيری رايس بيلديريب.

 باشقا بير يول آمريکا  و باشقا ئولکه لرين ب م ت واسطه سی ايله ايرانين منفی سياستينه مقاومت گوستريلمه سی دير. ب م ت نين تهلوکه سيزليک شوراسی نين 5 دائيمی عضوو + آلمان،  ايرانا  غير حربی اتمی پراگرامی، نقليات، ساغلامليق و اکين چيليک ساحه لرينين انکشافی ساحه سينده يارديم تکليف ائديبلر. اگر ايران اورانيوم زنگين لشديريلمه سی فعاليتنی دايانديرسا، اتمی سلاح لارين ياييلماسينا داير سازيشين شرط لرينه اساسا اوزه رينه گوتوردويو عهده ليک لری يئرينه يئتيرسه تهلوکه سيزليک شوراسی ايرانا تطبيق ائتدييی تحريم لری لغو  ائده جک.

 خانيم رايس دئييب کی، آمريکا نين ايران خالقی ايله هئچ بير فيکير آيريليغی يوخدور." ايرانليلار بوللوق و  داها آزاد حياتا لاييق دير. اونلار  سوزسوز کی، آرزولاديقلاری توپلومدا ياشاماغا لاييق ديرلر. آنجاق ايران حکومتی نين فعاليتی ثابت سيزليک کاراکتری داشيير" دئيه خانيم رايس سويله ييب.

سيز، آمريکا بيرلشميش دولت لری حکومتی نين  گوروش- نظرينی يانسيدان باش مقاله ايله تانيش اولدونوز.