مفتون امينی
 |
| داغيديلماميشدان قاباق ارک - تبريز |
ياشاسين قهرمان تبريز!
ايکی گون قالاندا بؤيوک چيللهدن
آغ گونش چيخاندا قارلی قولللهدن
قيزارتدی عئينالی اؤز يان-يؤورهسين
اونون شؤوقو آلدی ارکين دؤورهسين
اوجا بير سس دوشدو ساعات زنگينه
قيزيل شفق چؤکدو شهرين رنگينه
تبريزين قلبينه ايشيق ساچيلدی
آغير بير يوخودان گؤزو آچيلدی
مينلر سماوار تک خلقين سينهسی
قئينهدی، قئينهدی داشدی کينهسی
دورولدو رنگلری توتغون اوميدلر
قول-قاناد آتديلار يورغون ايگيدلر
هر کوچهدن بير سئل آخدی مئيدانا
مئيدان دولدو سولار چيخدی ائيوانا
اوز گتيردی شهره داغلارين يئلی
قاريشدی تبريزه کندلرين تئلی
داشلار اله دوشدو مئيدان چاييندان
داش ووران، داش يئين چيخدی ساييندان
هرنه اله ياتيب ووروب ييخديلار
دويونجا دوشمندن آجيق چيخديلار
ييخيلميش بوتلرين بوينو سيجيمده
توزلو- توپورجکلی چوخ پيس ليجيمده
ميلت گئتدی نوزولچولار جنگينه
آلوو تپدی يوز اوتوزدؤرد بانکينا
پولا حسرت کاسيب ال- اياق يالين
شق اسکيناسلارين آسدی تونقالين
ميلت نه ايستردی؟ - آزاد ياشاماق
دؤولت نه ايستردی؟ - اونو تالاماق
دوروب آياق اوسته دردين باغيريب
اؤز قارا گونونه شاهيد چاغيريب
يارالی-يارالی چکيب بايراغين
آنجاق کی بيلديريب ديری قالماغين
خيدمته باغلانيب اوجا هيمتين
باشلاييب قورتاريب ايشی چوخ چتين
هدفلری آيدين گوجلری ييغجام
بير مرامدان آلميش هاميسی ايلهام
نظملی –نقشهلی دوزگون اينقيلاب
تاريخده يازماييب بونو هئچ کيتاب
آی قوجامان تبريز اوزون آغ اولسون
دوشمنی يومشالتدين الين ساغ اولسون
ايرانا اؤرگتدين عوصيان ائتمگی
آزادليق يولوندا آييق گئتمگی
اولوردو هئی سنه ييرتيجی قورتلار
بيليرديم کی، بيرگون دؤزومون پاتلار
 |
| مقبره الشعرا |
هئی تاريخين چرخی چؤندو- دولاندی
دئييردين کی هاچان بو ايش اولاندی؟
ايگيرمی دوققوز گئچميش بهمن آييندان
نيشان گئتميش اوخون چيخدی ياييندان
بو ايش سنه چوخدا حؤرمت قازاندی
اوندان بری دوشمن حقينی قاندی
آسديلار شوشقاسين يوغون بئليندن
چيرکين يامانلاری دوشدو ديليندن
ووردولار- ازديلر يئللی بورنونو
وئرمهسين قاباغا زيغلی قارنينی
قويماسين حق سؤزو آياق آلتينا
دئمهسين مين يالان بير يوزآلتينا
حق دئييبدير تبريز ناحق ائشيتمز
حق يولوندا کيمسه اونا يئتيشمز
خاليص بير سؤزوم وار ايگيرمی دؤرد عيار
هامی داياناندا تبريز باشلايار
تبريز يئنه باشدير، بو سؤز دوغرودور
خلقی ستارخانين خلف اوغلودور
هر يئنی بهمنين ايگيرمی دوققوزو
آرتيق تانيياجاق دونيا تبريزی
قوی ايگيدلر بوگون چيخسين چاپاغا
آتيلسين آلمالار- گوللر قاباغا
بوی چاليب اويناسين بوگون قيز گلين
آرزوسو گؤيلونده قالسين دوشمنين
بزهسينلر ارکی بايرام آدينا
خوش گونونو تبريز سالسين يادينا
قوی دئسينلر بوگون صمد يئرين بوش
دئسينلر چای اوغلو اونون شعرين قوش
بير گوزل ايش گؤرسون هرکيم باشارا
قيزيل گول گؤندرسين اولدوز ياشارا
ائل شاعيری اوختای بوگون ياد اولسون
ائلين شاد ايستردی ائل ده شاد اولسون
قوی بئله گون شهره چيخسين کارناوال
ماراقلی پنجهلر توتسون تار- قاوال
قوی بو گونو دئسين قوجا عاشيقلار
ائل ايچينده باشی اوجا عاشيقلار
ظفرلر قازانسين قوجامان تبريز
ياشاسين. ياشاسين قهرمان تبريز
بو مقاله نی ای ميل ادين
چاپی ورسيا
