آمنستی اينترنشنال تهران رژيمينی آذربايجان تورکلرينين حقوقلارينا حرمت ائتمه يه چاغيريب
01/07/2006
بو گونلرده نفوذلوآمنستی اينترنشنال تشکيلاتی- بين الخالق عفو تشکيلاتی- ايران حکومتينی بابک قالاسينا يوروشو داغيتماماغا و ايرانداکی آذربايجان تورک لرينين حقوقلارينا حرمت ائتمه يه چاغيريب. حسابات دا آذربايجانليلارين ژوئنين 30 دا بابک قالاسينا يوروش ائده جه يی خبر وئره رک ايران حکومتينی بو يوروشه مداخله ائتمه مه يه چاغيرميشدی. تشکيلات همده تعجيلی اولاراق رسمی تهرانی آذربايجانليلارين حقوقلارينی تاپداماغا سون قويماغی طلب ائدير. حسابات دا دئييلير: ايرانين ان بويوک ائتنيک آزليغی اولان آذربايجان تورک لری عمومی اهالی نين 25- 30 فائيزينی تشکيل ائدير. اکثريتی شيعه اولان آذربايجانليلارين حقوقلاری باشقا ائتنيک و دينی آزليقلار قدر تاپدانمير بئله کی، اونلار ئولکه نين اقتصادياتيندا ئونملی رول اويناييرلار. آنجاق سون واختلار آذربايجانليلارين ئوزلرينين ملی مدنی حقوقلارينی ايسته مه يه باشلاييبلار. ئوز ديل لرينده مکتب له ياناشی بير سيرا حقوقلار ايسته ين اونلار هر ايل مدنی مختاريت ايسته يی ايله بابک قالاسينا توپلاشيرلار. اونلارين آراسيندا معين بير آزليق آذربايجان جمهوری سی ايله بيرلشمه يی آرزولاييرلار. آذربايجان مختاريتی اوچون چاليشان فعال لار ايسه ايراندا شبهه ايله قارشيلانير و پات- تورکيسم ده اتهام ائديلير. سون 6 ايلده بابک قالاسينا يوروشو داوام ائدن آذربايجان تورک لری ملی قهرمان لاری خرمدين بابکين آد گونونو قيد ائديرلر. بو توپلانتی لارا ايران حکومتی عادتی اوزره کوتلوی حبس لر و تضييق لرله جواب وئريريب. حبس اولونانلارين بير گروهونا جزالار وئريلير. کئچن می آييندا ايسه ايران رسمی قازئتينده آذربايجان تورک لرينين تحقير ائديلمه سی اونلارين اکثريتی دينج اولان اعتراض ميتينگ لرينين گئنيش وسعت آلماسينا سبب اولدو. ئونجه تبريز، تهران و ... دانشگاهلاريندا دانشجولار ميتينک کئچيرديلر. 22 می ده ايسه تبريز ده عظمتلی و نهنگ بير يوروش کئچيريلدی. بو ميتينگ لرين اکثريتی دينج کئچيريليب. آنجاق بعضی ميتينگ چيلر حکومت بينالارينی و ماشين لارينی دا يانديريبلار. آذربايجانليلار ايسه بونلاری تهران رژيمی نين آداملاری سايير. رسمی تهران اعتراض لارين آرخاسيندا آمريکا نين دايانديغينی دئسه ده واشنگتن بو اتهام لاری رد ائديب. ايران حکومتی آذربايجان دا کئچيريلن دينج نمايش لره افراط درجه ده زوراکيليق لار جواب وئريب. آمنستی اينترنشنالا 27 نفرين هلاک اولان آدامين ليستی چاتديريليب. اونلارين 7- سی تبريز ده 14 نقده ده، مشکين ده، خوی دا هلاک اولوب. اطلاعات امکداشی ايسه جليل عابدی باشينا گوللـه آتاراق اونو باشينين سول طرفيندن يارالاييب. دکترلارا اونا يارديم ائتمک اجازه سی وئريلمه ييب و او هلاک اولوب. اونون عائيله سينه ايسه اوغول لارينا ياس مراسيمی کئچيرمک اجازه سی وئريلمه ييب. اولجه ايران عموميتله آدام ئولمه ديينی دئسه ده سونرا پليس 4 نفرين ئولمه سينی و 43 نفرين يارالانماسينی تصديق له مه لی اولوب. آمنستی اينترنشنالا گلن معلوماتلارا گوره يوزلرله، بلکه ده مين لرله آدام حبس ائديليب. اونلاردان 200 نفرينين ليستی بين الخالق عفو تشکيلاتيندا وار. ژوئنين 23 آذربايجانين شرقی ايالتينين عدليه اداره سينين باشچيسی حجت الاسلام آقازاده، تکجه تبريزده 330 نفرين توتولدوغونو دئييب و اونلارين 85 نفرينين محاکمه اولوناجاغينی بيلديريب. او توتولان لاری اسرائيله جاسوسلوقدا، بهائی ليک ده و توده چيليک ده اتهام ائديب. بير نئچه نفرين دينديريلمک اوچون تهرانين "ائوين" زندانينا گوندريلديينی بيلديريب. تشکيلات مغاندان اولان داود مقامی نی مثال گتيره رک زندانی لره شکنجه وئريلديينی ده بيلديريب. بابک قالاسينا يوروش دن قاباق ايسه اطلاعاتين کوتلوی حبس لره باشلاديغی بيان ائديليب. تبريز، اردبيل، زنجان و... تانينميش آذربايجانليلارين حبس ائديلدييی بيلديريليب. حبس ده اولان و آجليق ائدن عباس ليسانی و غلامرضا امانی نين وضعيتينين آغير اولدوغو بيلديريليب، بين الخالق عفو تشکيلاتی ئوزلرينين ييغينجاق آزادليق لارينی طلب ائدن لرين فورا آزاد ائديلمه سينی و آذربايجان تورک لرينين حاقلارينين تانينماسينی طلب ائديب.
بو مقاله نی ای ميل ادين
چاپی ورسيا
بو مقاله نی ای ميل ادين
چاپی ورسيا
