سانفرانسیسکونون بین الخالق فیلم فیستوالی بو ایل 50 نجی ایل دونومونو یوزلر فیلم ایله جشن توتور. بو ایل فیستیوال 26 آپریل ده آچیلدی و می آیی نین 10 نونا قدر دوام تاپاجاق.

بو گون لرده یوزلر فیلم و مستند فیلم و قیسا فیلم بوتون دونیا اؤلکه لردن نمایش وئریله جک. فیلم لرین سایی بو ایل 200 فیلمه چاتدی (108 اوزون فیلم و 92 قیسسا فیلم) کی 54 اؤلکه دن اشتراک ائدیب لر. 11 فیلم بیرینجی دفعه دونیا دا گوستریله جک و 4 نفر یوکسک رژیسور و فیلم ایشنده اولان لارا جایزه وئریله جک. او جمله دن دونیا مشهور رژیسورلاری و سینما ایشچی لری جورج لوکاس، اسپایک لی، رابین ویلیامز و پیتر مورگان.

sfiff@metro 2

سانفرانسیسکو فیلم فستیوال یندا هم مشهور رژیسورلار و هم یئنی گنج رژیسورلار اشتراک ائده بیلرلر و بو فستیوال دونیا اوزرینده تانینمامیش فیلم لری کشف ائدیب و نمایش وئرر.

کئچمیش دوورلرده عباس کیارستمی، رخشان بنی اعتماد، محسن مخملباف و .... ایران دان بو فستیوال دا اشتراک ائتمیشدیلر. عباس کیارستمی، ایرانین ان تانینمیش و مشهور رژیسوری کوروساوا جایزه سی نی ایرانین مشهور آکتوری بهروز وثوقی اوچون اتحاف ائتدی و بو خبر ایران دا یاییلدی.

بو ایل ایران دان یالنیز بیر فیلم نیکی کریمی دن اشتراک ائدیب. اونون فیلمی "نئچه گون دن سونرا..." بیر 34 یاشلی گرافیست خانیمین بحران لی وضعیتی نی گوستریر که بیر طرف دن ناقیص اوشاغی نی یه لیک ائدیر و بیر طرف دن حیات یولداشی ایله آییریلماق ایسته ییر. او بیلمیر نئیله سین و بو آرادا تهران دا یاشاییش بوتون یاخشی پیسلی ایله دوام تاپیر و کیمسه بو خانیمین دردی قانمیر. نیکی کریمی نین فیلمی کیارستمی مکتب ینده ساییلیر کی مینی مالیست مکتب دیر. چوخ ساده و چوخ هیجان سیز لکن عین حال دا دوشونجه لی.

یاسر عرفاتین سون گون لری ده بیر فیلم دی کی فلسطین رهبری نین سون گونلرین اسرائیل محاصره سینده گوستریر.

تورکیه دن 3 فیلم اشتراک ائدیب: منیم تورک آتام بیر آلمانلی کیشی گوستریر کی تورکیه یه سفر ائدیر تا اوردا آتاسینی کی هئچ واخت گورمه ییب، گورسون و اوردا باجی لاری ایله تانیش اولیر و بیر کند یاشاییشی ایله آناتولی ولایت ینده تانیش اولور و اؤز یاشاشی دئییشیلیر. بو فیلم ان گوزل صحنه لرله تورکیه ده کئچن مساله لری دین و سیاست توتوب تا سکس و قادین - کیشی رابطه سینی گوزل حال دا نمایش وئریر. بو فیلم گلدن گئیت مکافاتی نی آلیب دیر.

بو فستیوال دا عراق دان، مصیردن، مالزی دن، کنیادان و روآندا دان و باشقا اولکه لردن ده بدیع فیلم لر اشتراک ائدیب. بو فیلم لری آنجاق بئله فستیوال لاردا تاماشا ائتمک اولار چونکو آمریکا دا هنری و تانینمامیش فیلم لرین از شانسی وار نمایش وئریلسین.