واشنگتوندان باخيش - آمريکا دولتی نين رسمی سياستی نين شرحی ايله تانيش اولورسونوز

 انسان حاقلارينين مدافعه چيلری، ايران آذربايجانيندان اولان ژورناليست - انسان حاقلاری فعالی سعيد متين پورون وضعيتينه دقت يئتريلمه سينه داير چاغيريش لار سسلنديريرلر. بين الخالق عفو تشکيلاتی- آمنستی اينترنشنالين بيلديرديينه گوره ، او مای آيينين 25 ده حبس ائديليب.

ئوز يازيلی آچيقلاماسيندا بين الخالق عفو تشکيلاتی بيلديريب کی،" يالنيز دينج فيکيرلرينی افاده ائتديينه گوره حبس ائديلميش وجدان محبوسو" سعيد متين پور حبس اولوندوقدان بری کيمسه ايله گوروشدورولمه ييب.

 سعيد متين پورزون خانيمی عطيه طاهری نين دئديينه گوره ، ايران رسمیلری اونا، اری نين نه يه گوره حبس اولوندوغو و هارادا ساخلانديغی باره ده بير سوز دئميرلر. خانيم ظاهری نين دئديينه گوره يالنيز بيرجه شئی بللی دير:

 " سعيد ئوزونون اينانديغی دوشونجه و ايده آ لارا گوره حبس ائديليب. او انسان حاقلارينا- ايرانداکی آذربايجانلی لارين ئوز آناديلينده تحصيل آلماق و ئوز آنا ديلينده مکتب لر و يونيورسيته لره صاحب اولماق حاقلارينا اينانير. اونا گوره ده سعيد بو باره ده مبارزه آپارير. آنجاق گوروندويو کيمی ايرانليلار( ايران رسمی لری) فرقلی دوشونورلر."

آمريکانين دولت دئپارتمنتی- خارجی ايشلر ناظرلييی نين انسان حاقلاری اوزره ان سون راپورتوندا " ايرانداکی آذربايجانليلار، اونلارا قارشی ديل آيری سئچکی ليک لری، آنا ديل لرينين مکتب لرده تحصيلينين ياساق لانماسی ، آذربايجانلی لارين تشکيلاتلار و فعال لارين تعقيب ائديلمه سی و آذربايجان يئر آدلارينين ده ييشديريلمه سی باره ده معلوماتلار وئرديکلری" بيلديريلير.

" رهبری تحقير ائتديينه"( ايرانين ملا رژيمی نين باشچيسی علی حسينی خامنه ای) و نئجه دئيرلر " نظامين عليهينه تبليغاتا" گوره بير ايله ياخين زنداندا قالديقدان سونرا آزادليغا بوراخيلان رضا عباسی ايران- آذربايجانلی فعال لاريندان دير. آذربايجانلی سياسی محبوسلارين مدافعه کميته سينين عضولريندن و آچيق سوزلو انسان حاقلاری مدافعه چيلريندن بيری اولان رضا عباسی دئيير کی، اساس پرابلم تکجه آزليق لارين حقوقلاری مسئله سی دئييل بوتون ايرانلی لارين آزادليغی دير.

 " آذربايجانليلار( ايرانلی آذربايجانلیلار) و ايرانداکی باشقا آيدين فيکيرلی انسان لار ايران حکومتينين بين الخالق انسان حاقلاری و دموکراسی يه حرمت ائتمه سينی ايسته ييرلر. تاسوفله بو حقوقلارا ايراندا سايغی گوستريلمير. بيز ده يالنيز بونا گوره ايران رهبرينی سورغولاييريق. منيم يازديقلاريم بو باره ده ايدی. آنجاق اونلار بونو جرم و جنايت سايديلار. حکومتيمی تنقيد ائتمک بير انسان کيمی منيم حاققيمدير. رهبر آللاه دئييل کی، تنقيد اولونماسين."

آمريکانين خارجی ايشلر ناظرلييی نين سوزچوسو شان مک کورمک " آمريکا، ايران رژيمينی ئوز وطنداشلارينا قارشی سيستملی تعقيب- تضييق لری دايانديرماغا ، بوتون ايرانلی لارين انسان حاقلارينا حرمتله ياناشماغا، ئوزلری نين سوز آزادليغی، مطبوعات، آزاد توپلاشما، عبادت و عدالتلی ايش استانداردلاری کيمی بين الخالق انسان حاقلاری و آزادليقلاری اوغروندا مبارزه آپاران انسان لاری آزاد ائتمه يه چاغيرير."

بو واشنگتونون رسمی باخيشی ايدی.