دیز چؤکوب قارشیندا دوعا ائدیرم
اوجالاردان اوجا بیلیرم سنی
ساخلا اؤز یانیندا روحومو آللاه
بیرده بو دونیایا گتیرمه منی
...
سیرلی رویالاریم داغیلاجاقسا
آرزوم گؤزلریمده بوغولاجاقسا
عذابیم منیمله دوغولاجاقسا
بیرده بو دونیایا گتیرمه منی
...
نامردی مردیندن چوخ اولاجاقسا
عالیم لر آج ، گدا توخ اولاجاقسا
یارانمیشلار بیرگون یوخ اولاجاقسا
بیرده بو دونیایا گتیرمه منی
...
بو دونیا ذوق – صفا وئرمه سه اگر
هر درده بیر شفا وئرمه سه اگر
عزرائیل استعفا وئرمه سه اگر
بیرده بو دونیایا گتیرمه منی
...
بو یالان دونیانین ترس آیناسی وار
سئوینجه به نزه یه ن چوخ بلاسی وار
تکرار گؤرمه ییمین نه معناسی وار ؟
بیرده بو دونیایا گتیرمه منی
...
گؤردوم بو دونیانی ، قورو قفسدیر
سن بیزه وئردیین عیبرتلی درسدیر
بیر دفعه پئشمان اولموشامم دا بسدیر
بیرده بو دونیایا گتیرمه منی
....
دیزچؤکوب قارشیندا دوعا ائدیرم
اوجالاردان اوجا بیلیرم سنی
ساخلا اؤز یانیدا روحومو ، آللاه
بیرده بو دونیایا گتیرمه منی