آزادليق راديوسونون موخبيری ايلقار نسيبوف آزادليغا بوراخيليب. بو گون ناخجيوان عالی محکمه سی شهر محکمه سينين اونون 3 آيليق حبسی باره ده قرارينی لغو ائديب. حاکيم(قاضی) اونو بوهتان اتهامی ايله محکمه يه وئرن ناخجيوان شهر پليس اداره سينين رئيسی صبوحی نوروزوفون ادعاسينی گئری گوتوردويونو، تجديدنظرشکايتينی نظره آلديغينی بيلديريب. ايلقار نسيبوفون حبسی چوخ سايلی بين الخالق تشکيلاتلارين اعتراضی ايله قارشيلانيب. ازادليق راديوسونون پرزيدنتی موخبيره قارشی ايره لی سورولن اتهامی اساس سيز آدلانديريب و موخبيرين فوری آزادليغا بوراخيلماسينی طلب ائتيشدی. آمريکانين دولت دئپارتمنتی، اروپا شوراسينين باش کاتيبی، نروژ و آمريکانين آذربايجانداکی سفيرليک لری، ژورناليست لری بين الخالق مدافعه کميته سی، سرحدسيز رئپورترلار و باشقا چوخ سايلی حقوق- مدافعه تشکيلاتلاری دا موخبيرين آزاد اولونماسينی طلب ائديب. بونونلا ياناشی، جناب نسيبوف حاضيردا آزادليقدا اولماسينا باخماياراق محکمه باشقا بير ادعا اوزره اونا بير ايل مدتينه شرطی جزا کسيب. بئله کی، دسامبرين 6-دا اونون ائويندن مصادره ائديلميش کامپيوتردن هانسی سا مقاله تاپيليب. محکمه نين ادعاسينا گوره، گويا چاپ اولونماميش همين مقاله ده باشقالارينا بوهتان آتيليب.