تاپديق فرهاد اوغلونون «2007-جی ايله باخيش، دونيا آذربايجانليلارينا موراجيعت» رپورتاژی

آذربايجان بو ايل يئنی ايلی داها طنطنه لی قارشيلاييب. تاريخده ايلک دفعه اولاراق اؤلکه نين باش ميدانی- «آزادليق» ميدانيندا يئنی ايل طنطنه لری کئچيريليب و یئترلی قدر گورولتولو آتشفشانليق اولوب. طنطنه لرده اون مينلرله اينسان اشتيراک ائديب. بو هم ده اؤزلویونده نفت پوللارینين اؤلکه نين حياتينا تاثيريندن خبر وئرير. پرزيدنت الهام علیيئوين خالقا تبريکينده دئييلير کی، 2007-جی ايل آذربايجانين هرطرفلی انکشافی اوچون چوخ اوغورلو ايل اولوب. «2007-جی ايلده آذربايجان اؤز بينالخالق موقعلرينی محکملنديريب، بؤيوک اقتصادی انکيشافا نايل اولا بيلمه ييب. بيزيم اؤلکه ميز چوخ سرعتله انکيشاف ائدير. اؤلکه ميزين بوتون ساحه لری چوخ اوغورلا و سرعتله انکيشاف ائدير. اقتيصادی انکيشافدا آذربايجان اوچونجو ايلدير کی، دونيادا اؤز موقعلرينی، رهبرلیک موقعلرينی ساخلايا بيلمه يب». اونون دئديیينه گؤره، 2005-جی ايلده آذربايجان اقتصادياتی 26 فايز، 2006-جی ايلده ايسه 35 فايز آرتيب. «بو يوکسک ديناميک 2007-جی ايلده ده ساخلانيليب. بو ايل آذربايجان اقتصادياتی 25 فايز آرتيب. بو، دونيادا تایی اولمايان بير گؤستريجیدير و شوبهه سيز کی، آذربايجانين بوتون انکشافينا چوخ بؤيوک درجه ده مثبت تاثير گؤسترن عامل دير. آذربايجانين اقتصادياتی انکشاف ائتديکجه بوتون ساحه لرده ايره ليله یيش، جانلانما مشاهده اولونور. بيزيم بودجه خرجلريميز آرتير. 2003-جو ايلله مقايسه ده بودجه خرجلريميز 10 دفعه آرتيب. آذربايجانين تام بودجه سی گلن ايل 12 ميليارد دلار تشکيل ائده جک. بو، چوخ بؤيوک رقمدير و بيزه امکان وئره جک کی، اؤلکه نين قارشيسيندا دوران بوتون وظيفه لری اوغورلا يئرينه يئتيره بيلک». دولت باشچيسی بيلديريب کی، آذربايجاندا دؤرد ايله ياخيندير بؤلگه سل سوسيال-اقتصادی انکشافی دولت پروگرامی اجرا اولونور. بو پروگرامين آذربايجانين بؤلگه لرينين انکشافینين تامين ائديلمه سی اوچون چوخ بؤيوک رولو اولوب. «بؤيوک غرور حيسسی ايله دئيه بيلرم کی، بو دؤرد ايل عرضينده آذربايجاندا 600 ميندن چوخ يئنی ايش يئری آچيليب کی، اونلارين دا 460 مينی دايمی ايش يئريدير». پرزيدنت 2007-جی ايلده ان آز امک حاققی و امکلیلیک حاققینین آرتيريلديغينی دئييب. بودجه دن ماليه لشن تشکيلاتلاردا ايشلهينلرين امک حاقلاری دا آرتيريليب. «2008-جی ايل ژانویهنین 1-دن مينيموم امک حاققی و مينيموم امکلیلیک حاققی 20 فايز آرتاجاق و 60 ماناتا چاتاجاق. بو، بؤيوک ايره ليله یيشدير. آنجاق، البته، بو رقم هله کی، بيزی تام شکلده قانع ائده بيلمز. بيز ايسته ييريک کی، آذربايجان وطنداشلاری - ايستر دولت تشکيلاتلاريندا ايشله نيلر، ايسترسه ده امکلیک لر نرمال امک حاقلاری آلسين. بو امک حاقلاری اونلارين بوتون ایستکلرینی اؤده يه بيلسين».

اونون سؤزلرينه گؤره، سون دؤرد ايلده آذربايجاندا 1200-دن چوخ يئنی مکتب تيکيليب، يوزلرله مکتب تمير اولونوب و بو پروسه 2008-جی ايلده داوام ائتديريله جک. «اونلارجا يئنی خسته خانا، پولی کلينيک تيکيلمه سی، ان اوجقار يئرلرده يوکسک سوويه لی طبی خدمتين تامين ائديلمه سی نظرده توتولور. بوتون بونلار آذربايجاندا سوسيال ساحه نين انکيشافی اوچون چوخ واجب اولان عامل لردير و شوبهه سيز کی، 2008-جی ايلده بو ساهه يه داها دا بؤيوک دقت گؤستريله جک». جناب علی اف حساب ائدير کی، 2007-جی ايلده آذربايجانين گله جک انکشافی اوچون چوخ بؤيوک و تاريخی حادثه لر باش وئريب. «2007-جی ايلده باکی-تفليس-جيهون نفت کمری، دئمک اولار کی، تام گوجو ايله ايشله مه يه باشلاييب. واختيله بو لايحه شوبهه ايله ياناشان، ياخود دا اونا انگللر تؤرتمک ايسته نیلر آرتيق گؤرورلر کی، بونا نايل اولا بيلمه ديلر.

بيز قارشيدا دوران بوتون وظيفه لری اوغورلا اجرا ائتميشيک. باکی-تفليس-جيهون نفت کمری نين تيکينتيسی و اوغورلا فعاليت گؤسترمه سی، البته کی، آذربايجانين اقتصادی پتانسيلينی آرتيرير. بو ايل بيز باکی-تفليس-ارزروم گاز کمرینين استثمارينا نايل اولموشوق. آذربايجان گازی هم اؤلکه اهاليسینين طلبینی اؤده يير، - گله جک ايللرده داها دا بؤيوک حجمده اؤديه جک، - هم ده قونشو اؤلکه لره اخراج ائديلير. بو گون بيز اؤز گاز امکانلاريميزدان استفاده ائديب بؤلگه ده سياسی و اقتصادی گوجوموزو محکملنديريريک. آرتيق اوچ اؤلکه يه آذربايجان گازی ساتیلیر و گله جکده بو اؤلکه لرين جغرافياسی گئنيشلنه جک. بو، بيزه هم اقتصادی گلیرلر گتيره جک، هم ده سياسی موقعلريميزی اهميتلی درجه ده محکملنديره جک. آذربايجان آرتيق آوروپانين انرژی تهلکه سيزليگی اوچون چوخ اؤنملی اؤلکه يه چئوريلير و بيز بوندان اولدوقجا ممنونوق». دولت باشچيسی 2007-جی ايلده باکی-تفليس-قارص دمير يولونون ریلی قويولدوغونو بيلديريب. «بو لايحه اوزون ايللر ايدی کی، مذاکره موضوعسو ايدی. آنجاق بونو حياتا کئچيرديک، رئالليغا چئويرديک. باخماياراق کی، بو لايحه يه بينالخالق ماليه قوروملاری طرفيندن او قدر ده بؤيوک دستک يوخ ايدی، عکسينه، بعضی خارجی قووه لر بو لايحه نی انگلله مک اوچون بؤيوک سعی لر گؤستريب. آما بيزيم اراده ميز، قونشو، دوست اؤلکه لرين بيرگه فعاليتی امکان وئردی کی، بونا دا نايل اولدوق. بونون آذربايجان اوچون و خالقيميز اوچون چوخ بؤيوک تاريخی اهميتی اولاجاق. بو دمير يولونون تيکينتيسی ايله اؤزوموزو تورکيه ايله بيرلشديريريک، آوروپانی آسیا ايله بيرلشديريريک و بئله ليکله، آذربايجان ترانزيت اؤلکه کيمی نه اينکه انرژی، عينی زاماندا، نقليات باخيميندان عوض اولونماز اؤلکه يه چئوريلير». پرئزيدنت ارمنستان-آذربايجان مناقيشه سی، افسوسلار اولسون کی، 2007-جی ايلده اؤز حلينی تاپمادی دئيه قيد ائديب. «اما گناه بيزده دئييل، گناه ارمنستانين غير عملی موقعينده دير. بيز دانيشيقلارا حاضريق و بو دانيشيقلاری آپاريريق. باخماياراق کی، دانيشيقلارين هله هئچ بير نتيجه سی يوخدور. ساده جه، بيز چاليشيريق کی، بو مسئله نی صلح يولو ايله حل ائدک، بين الخالق حقوق اساسيندا حل ائدک. افسوسلار اولسون، ارمنستان طرفینين غير عملی موقعی، ايشغالچی سياستی امکان وئرمه دی کی، بيز 2007-جی ايلده بو مسئلهن ی حل ائدک. بيز اؤز اراضی بوتؤولویوموزو هئچ واخت گذشته گئتميه جه یيک. آذربايجانين اراضی بوتؤولویو توخونولمازدير، داغليق قاراباغا هئچ واخت مستقلليک وئريلمه یه جکدير. آذربايجان رهبرليگی و آذربايجان خالقی هئچ واخت بونونلا راضی اولماياجاق. بين الخالق اجتماعيت ايسه داغليق قاراباغين مستقلليیينی هئچ واخت تانيماياجاق. بيز دانيشيقلاری بو استقامتده آپاريريق. سيزه دئيه بيلرم کی، دانيشيقلارين اساس ماهيتی اوندان عبارتدير کی، آذربايجانين ضبط اولونموش بوتون تورپاقلاری اشغالچيلاردان آزاد ائديلسين، آذربايجان وطنداشلاری – مجبوری کؤچگونلر همين تورپاقلارا قاييتسينلار، او جومله دن ده داغليق قاراباغا قاييتسينلار. بو، بيزيم پرينسيپال مؤوقعيميزدير و بو مؤوقئدن بير آدديم دا کنارا چيخماياجاغيق.