خزر دنيزی نين ديبيندن چيخاريلان نفت بيرباشا پايتخت باکی ياخينليغيندا اولان سانقاچال ترمينالينا آخير. بورايا گتيريلن نفت، انرژييه سوساميش اروپا و آسیا اؤلکه لرينه چاتماق اوچون باکی-تفلیس-جيهون اساس صادرات بورو کمری واسطه سييله تورکيه نين جيهون بندرینه گؤندريلير.
واشنگتون داکی تهلوکه سيزليک سياستی مرکزيندن آلکس آلکسیيئوين سؤزلرينه گؤره، ياناجاقلا زنگين بو بؤلگه ده گله جکده باش وئره جک حادثه لر دونيانين قووه لر ترازليغينی دييشه بيلر: "کيم گاز و نفت ياتاقلارينا نظارت ائديرسه، او حقيقتا بؤيوک گوجه ماليکدير و بو، دوغوردان دا قووه لر ترازليغينی دييشير".
غرب باکی-تفلیس-جيهون لايحه سينی غلبه سايير. خزر دنيزی نين نفت و گاز احتياط لارینين مهم بير قسمتی هله ده روسيه بورو کمرلری واسطه سيله آخير.
تورکمنستان قيسا مدت اول طبیعی گازينی روسيه یه آپارماغی نظرده توتان بورو کمرینين اينشاسی حاقدا راضيلاشمايا امضا آتيب. آلکسييئو دئيير کی، انرژی احتياط لاری اوزرينده انحصارا ماليک انحصاری روسيه سياسی ايستکلرينی قبول ائتديرمک اوچون دونيايا فشار گتیره بيلر: "روسيه، تکجه لوله لرین قازانج الده ائتمک مقصديله تولید ائديليب، ساتيلديغی کاپيتاليست پرينسيپلر اساسيندا فعاليت گؤسترمک ايسته مير. روسلار کربوهيدروژن منبع لريندن سياسی مقصدلر اوچون استفاده يه اوستونلوک وئريرلر. "
مرکزی آسیا نفت بورو کمری ده روسيه دن يان کئچه رک خزر نفتينی افغانستان و پاکستان واسطه سيله شرقه چاتديرماق اوزرينده پلانلاشديريليب. آنجاق بؤلگه ده دوام ائدن زوراکی ليقلار کمرين اينشاسينی لنگيدير.
بير مدت اول روسيه، اوکراين و بلاروسا انرژی تجهيزاتينی کسميشدی. چوخلاری بونون سياسی سببلرله باغلی اولدوغونا اينانيرديلار. بو عصبی حرکت باکی-تفلیس-جيهون طرفدارلاری نين باخيشلارينی تصديق ائدير. اجتماعی و اقتصادی انکشاف مرکزيندن ووقار بايرام اوو دئيير کی، آذربايجان غربله امکداشليق ائدير و "نابوککو" بورو کمرینين تيکينتی سينی ده دستکله يير. کمر خزر بؤلگه سیندن قاز صادر ائده جک. جناب بايرام اووون سؤزلرينه گؤره، روسيه نين دوستو يوخدور: "اونون اؤز ماراقلاری وار. غربين بير عادتی وار کی، دوست اؤلکه لره داها چوخ گلير قازانديرماق اوچون داها چوخ ايش گؤرور. آنجاق روسيه نين بئله بير تجروبه سی يوخدور."
غرب باکی-تفلیس-جيهونو روسيه اقتصادياتی نين ضعیف اولدوغو واخت تيکيب. خاريجی علاقه لر اوزره آلمان شوراسيندان آلکساندر راين ین فيکرينجه، يوکسک ياناجاق قيمتلری روسيه نی وارلی، گوجلو ائديب و دونيانين سياسی اورتامینا يئنيدن قايتاريب. اونون سؤزلرينه گؤره، روسيه انرژی ساحه سينده سوپر دولت اولماق ايسته يير.
جناب راین روسيه نين گلوبال اورتامدا اؤز مقصدلرينه نايل اولماق اوچون نفت و گازين اروپا و آسیايا ساتما يوللاری اوزرينده انحصارا ماليک اولماق ايسته ديیينی، آنجاق بو بازارين نظارت ائديله بيلمه يه جک قدر مختلف منبعلرله باغلی اولدوغونو دئيير.
انترنت دن پروگراملار
بو مقاله نی ای ميل ائدين
چاپ اوچون متن
