آزربايجاندا ژانويه نين 5-دن باشلايان قار هله ده کسيلمه ييب. ئولکه نين بوتون شوسه يوللاری بوز باغلاييب، ماشينلارين حرکتی محدودلاشيب. هاوا متخصص لری ياخين گونلرده قارلی و شاختالی هاوا شراييطی نين داوام ائده جه يينی بيلديرير.

 اکولوژی و طبيعی ثروت لر ناظرليينين هيدرو مترولوژی ئون گورمه لر (هاوا "پيش بينی"سی) اداره سينين مدير عوضی عمران ممدوف" آمريکانين سسی" راديوسونا بيلديريب کی، بعضی بولگه لرده قار ئورتويونون اوجاليغی 64 سانتی متره چاتيب و قار ياغينتی سی هله ده داوام ائدير. جناب ممدوف شوسه يولارين بوز باغلاديغينی بيلديريب. اونون سوزلرينه گوره، ئولکه اراضی سيندن گورجوستانا، ايرانا و روسيه يا کئچن اتومبيل يوللاريندا قار ييغينتی سی داوام ائدير. هاوا متخصص لری نين معلوماتينا گوره، ئولکه اراضی سينه نسبتا ايستی هاوا کوتله سی ژانويه نين 10-دان باشلاياجاق. او ساباح گون اورتادان سونرا يئنیــدن قار ياغاجاغينين گوزلنديينی بيلديرير.

هاوا شرايطی نين الوئريش سيز کئچمه سی ايله باغلی ژانويه نين 10-دک ئولکه نين بوتون اورتا عموم تحصيل مکتيب لرينده و مکتيبه قدر تحصيل اوجاقلاريندا درسلر تاخيره سالينيب.

 گون عرضينده پايتخت باکی نين يوللاريندا اتومبيل لرين حرکتی ده محدود اولوب. اهالی نقليات چتين ليک لری ايله اوزله شيب. انسانلار اساسا مترو ايله حرکته اوستونلوک وئريبلر. باکی مئرلييی( شهرداری) يوللارين تميزلنمه سی اوچون چوخ سايلی قارکوروين ماشينلاردان استفاده ائتديينی بيلديرسه ده، يوللاردا قار و بوز ئورتويو قالماقدادير. باکی مئرلييی نين تصروفات شعبه سينين مديری خالد علسگروف اساسا پايتختين مرکزی يوللارينين تميزلنديينی دئيير. ئولکه نين هاوا ليمانلاری دا بو گون طياره لری قبول ائده بيلمه ييب."آزال" دولت هاوا يوللاری نين شعبه مديری محرم صفرلی"آمريکانين سسی" راديوسونا بيلديريب کی، قيسما اوچوشلارا يئنیدن باشلانيلير.