ايران محکمه لريندن بيری داها بير انسانين حياتينا سون قويولماسينا قرار وئريب. 22 ياشلی جاوان اوغلان يالنيز آلکوللو ايچکی ايچديينه گوره اعدام جزاسينا محکوم ائديليب. ايسنا خبر آژانسی نين وئردييی معلوماتا گوره ائوينده ايچگی ايچديينه گوره حبس ائديلن همين جاوانين بوندان ئونجه داها 3 دفعه عينی سببه گوره حبس اولوندوغو بيلديريلير. ايسنا خبر اژانسينين خبرينه گوره، اعدام جزاسينی تهرانين 72-جی شعبه نين باشچيسی قاضی جليلی چيخارديب.

بين الخالق انسان حاقلارينی مدافعه تشکيلاتلارينين اعتراض لارينا باخماياراق سون زامانلار ايراندا اعدام حاللاری آرتيب. بو رژيمين محکمه لری ال-قول قيچ- آيق کسيلمه سی کيمی مين ايل قاباقکی دهشتلی جزالاری خاطيرلادان قرارلار چيخارماغی داوام ائتديرير.

 بير مدت ئونجه ايرانين بلوچستان ايالتينده بير گروه محبوس حاققيندا ال-آياق کسيلمه سی حوکم لری اجرا ائديليب.   ميللی و انسان حاقلارينی مدافعه ائدن فعاللارا ايسه حبس، سورگون و مادی جريمه  کيمی جزالارلا  ياناشی شاللاق وورولماسی کيمی حوکم لر چيخاريلير. ساولان سسی وب صحيفه سينين  معلوماتينا گوره  اهرانقلاب محکمه سی افشین بزاز قدیم ، کریم کارگر، مرتضی شکری سرقینی و عوض حسن پور  حاقدا 6 آی حبس له بيرليکده 70 شاللاق قراری چيخاريب. اونلار ئوتن ايل آزربايجانليلارين رسمی سويه ده تحقير اولونماسينا قارشی اعتراضلاردا اشتراک ائتديکلرينه گوره بو جزالارا محکوم ائديليب لر.

اعدام صحنه لريندن بيری.

.

سون واختلاردا همده تهران شهرينده چوخ سايلی انسان دار آغاجيندان آسيلميشدير. يئرلی و خارجی مئديانين معلوماتينا گوره همين متهم لره حتی اعتراض حاققی وئريلمه ميش و ايلکين محکمه نين اعدام قرارلاری فوری اولاراق گرچک لشديريلميش دير.

ايراندا 18 ياشيندان اشاغی يئنی يئتمه لرين اعدامی دا عادی حالا چئوريليب. سون گونلرده اروپا بيرلييی و "هيومن رايتز واچ" کيمی انسان حاقلارینی مدافعه تشکيلاتلاری ايراندا ئوزل ليکله آز ياشلی لارين اعدامی حاللارينی پيسله ين بياناتلا چيخيش ائديب.

 بو آرادا ژورناليست لری مدافعه تشکيلاتی نين ايل ليک راپورتونا گوره، ايران ژورناليست لرين دونياداکی 4-جو حبس خاناسی دير. قورومون آچيقلاماسينا گوره ايراندا مصتقل مطبوعاتين فعاليتينه اجازه وئريلمير و حکومتی تنقيد ائتديينه گوره ژورناليست لر حبس ائديلير.