گورجوستانين يوکسک سويه لی رسمی لرينين بيلديرديينه گوره آرتيق بو ئولکه نين  حربی قوه لری جنوبی اوسئتيا سئپاراتيست بولگه سيندن چيخيب و بو اراضی نين نظارتی روسيه نين الينه کئچيب. گورجوستانين تهلوکه سيزليک شوراسينين باشچيسی الکساندر لومايا بو گون- بازار گونو ژورناليست له آچيقلاماسيندا سويله ييب کی، آرتيق گورجوستانين حربی قوه لری جنوبی اوسئتيادان قيراقدا يئرلشديريليب.يادا سالاق کی، گورجوستانا قارشی محاربه يه 10 مين نفرليک قوه سينی گوندرن روسيه حکومتی، گورجوستان حربی قوه لرينين چيخماسينی دانيشيقلارا شرط کيمی ايره لی سورموشدور. روسيه طياره لری نين بير سيرا گورجوستان موقع لرينی بمبالاماسی ايله ياناشی بو ئولکه نين حربی گمی لری ده گورجوستانين قارا دنيز ساحيل لرينی نظارته آليب. بو آدديم گورجوستانا حربی سيلاح- سورساتين گتيريلمه سينه مانع اولماق مقصدی ايله شرح اولونور. اروپا تهلوکه سيزليک و امکداشليق شوراسينين فينلاندلی باشچيسی نين بو گون تيفليس ده مسئله نی مذاکره ائده جه يی گوزله نيلير. بو آرادا آبجازياداکی سئپاراتيست (آيريليق چی) حکومت  ده  کودوری دره سينی اله کئچيرمک اوچون قوه لرينی حاضيرليغا گتيرديينی دئييب. روسيه نين باش وزيری ولاديمير پوتين ايسه دئييب کی، گورجوستان ئوز خالقينا قارشی سوی قيريمی ائديب و بونا گوره ده جنوبی اوسئتيانی اداره ائتمک حاققينی ايتيريب. ب م ت نين باش کاتبی بان کی مون محاربه نين دايانديريلماسينا چاغيريب. گورجوستانين ايچ ايشلر وزيری محاربه ده 150 نفرين ئولدويونو دئسه ده روسيه بو رقمين 1500 اولدوغونو سويله ييب. يادا سالاق کی، آبخازيا و جنوبی اوسئتيا 1990-جی ايل لرده گورجوستاندا آيريلديقلارينی اعلان ائديبلر.