Prezidan ameriken an, Barack Obama, ap bay lidè fransè a, Nicholas Sarkozy, lanmen pandan yon priz foto-an-gwoup lidè G8 ak G5 yo nan vil L'Aquila, ann Itali, 9 Jiyè 2009 la.

Lidè peyi ki pi rich nan lemond yo –pami yo nou jwenn prezidan ameriken an, Barack Obama- ap rankontre jodiya ak dirijan peyi afriken yo pou yo pale de sekirite alimantè nan lemond. Yap fè chita-pale sa yo nan vil L’Aquila, ann Itali, kote somè G-8 la rive sou 3èm. e dènye jou li. Obsèvatè yo atann yo aske patisipan yo mete fen nan somè ekonomik sa a avèk yon angajman kote y ap pwomèt pou yo mete yon sòm 15 milya dola a la dispozisyon peyi pòv yo pou ede yo konbat grangou epi devlope sektè agrikòl la lakay yo. Aprè prezidan ameriken an va fin pran peti-dejene avèk delege afriken yo, li pral fè yon rankont separe ak reprezantan ofisyèl peyi Afrik di Sid yo anvan l al rann Pap Benwa 16 yon vizit. Apre sa, lap kite Itali pou li ale ann Afrik.

Aprè sesyon yè jedi a, prezidan ameriken an te pran lapawòl sou youn nan tèm diskisyon somè a, ki se travay ki nesesè pou konbat rechofman Planèt la gras ak yon seri de dispozisyon k ap pèmèt peyi endistriyalize yo sitou diminye kantite gaz k ap monte nan lè a. Si delege yo pa rive jwenn yon antant sou kesyon emisyon gaz la, yo jwenn yon konsansis pou yo itilize lòt mwayen pou eseye limite rechofman planèt la, dekwa pou tanperati a desann rive nan yon nivo kote l ap sèlman 2 degre santigrad an plis sa l te ye anvan revolisyon endistriyèl la. Misye Obama di --n ap site:

"A la fen dè fen, nou genyen yon chwa: Nou kapab bay avni nou fòm nou vle nou-menm, oubyen nou ka kite evennman yo ba li nenpòt ki fòm. Nou kapab retounen nan deba ki p ap mennen okenn kote epi retounen nan ansyen divizyon yo, oubyen nou kapab deside ale de lavan e fè fas ak defi sa yo ansanm."

Sekretè-jeneral Oganizasyon Nasyon Zini an, Ban Ki-moon

Prezidan Obama (agoch) ap pale avèk Premye Minis endyen an, Manmohan Singh, anvan lidè G-8 yo te rankontre ak delege peyi afriken yo nan vil L'Aquila, nan sant Itali, vandredi 10 jiyè 2009 la.

, te patisipe tou nan deba yo nan vil L’Aquila kote somè a ap dewoule a. Sa pa gen lontan, yon tranbleman-de-tè te fè gwo dega nan vil italyèn sa a. Misye Ban lanse avètisman bay patisipan yo pou l di yo dispoziyon y ap anvizaje yo pap sifi pou rezoud pwoblèm ki poze yo. Chèf l’ONI an fè konnen --n ap site: “Politikman e moralman se yon obligasyon e se yon responsabilite istorik lidè yo dwe pran pou yo pwoteje avni limanite.»

Aprè somè G-8-la kap pan fen jodi jedi 10 jiyè a, Prezidan Obama prale nan peyi Gana pou premye vizit li nan rejyon ki anba Sahara a depi l te monte sou pouvwa a. Michelle Gavin se prensipal konseye La Mezon Blanch pou politik Lèzetazuni konsènan kontinan afriken an. Madam Gavin pale pou l di: « Se yon mesaj Lèzetazini vle lanse, pou l di Lafrik fè pati gwo visyon nou genyen pou politik entènasyonal nou an ; se pa yon rejyon separe ki vin sou ajanda nou yon fwa an pasan e ki pa sou gwo liv politik etranjè nou an."

Prezidan Barack Obama gen pou l debake nan peyi Gana nan fen jounen vandredi 10 jiyè a.