Konfederasyon Amerik-di-Nò, Amerik Santral ak Karayib Foutbòl la (CONCACAF) soutni kandidati Etazini pou l òganize Mondyal 2018 la oubyen 2022 a. Meksik te retire kandidati l la depi Septanm, sa ki fè ke Etazini rete sèl reprezantan Amerik la nan kous pou òganize youn nan mondyal sa yo.
Prezidan CONCACAF la, Jack Warner, fè konnen " òganizasyon lap dirije a pral pote yon supò total bay Etazini", ki te òganize Mondyal 1994 la. Jack Warner se youn nan 24 manm Komite egzekitif FIFA a ki pral deside an desanm 2010 ki peyi ki pral jwenn otorizasyon òganize Mondyal 2018 oswa 2022 a.
Apre Etazini, lòt peyi ki kandida yo se Ostrali, Angletè, Endonezi, Japon, tandèm Oland-Bèljik la, Larisi, tandèm Espay-Pòtigal. Katar ak Kore-di-Sid poze kandidati yo sèlman pou mondyal 2022 a.
jbeliz@voanews.com
