افغانستان کې د دریو بهرنو هیلې کاپټرونو د غوځیدو له امله ١۴ امریکاي عسکر وژل شوې دي. عکس کې د نیټو هیلې کاپټر لیدل کیږي چې د کابل په لویز کې الوت کوي

دافغانستان په جنوب او لويديز کې ديو هيلي کاپټر دغورځيدو او ددوؤ نورو دټکر کيدو له امله ١٤ امريکايان وژل شوي او ٢٦ کسان نور ژوبل شوي دي.
 ناټو پوځي ایتفلاف پخپل يو بيان کې دچورلکو دټکر کيدو او راپريوتو دپيښو پخلى کړى دى او وايي چې دغه پيښې ددښمن دکارروايۍ له امله نۀ دي رامينځته شوي.
ناټو وايي په لويديز افغانستان کې يې دنامعلومو وجوهاتو له امله يوه چورلکه پريوتې اؤ تباه شوې ده چې پکې ٧ امريکايي عسکر او ٣ امريکايي اولسي وگړي وژل شوي دي.
بيان کې دا هم ويل شوي دي چې په دغه پيښه کې ١٤ افغانان او ١٢ امريکايان ژوبل شوي دي چې پکې ٧ امريکايي عسکر او درې امريکايي اولسي وگړي شامل دي.
دايساف يو چارواکي دنوم نۀ څرگندولو په شرط خبريالانو ته ويلي دي دغه پيښه دافغانستان په بادغيس ولايت کې رامينځته شوې ده.
له دې وړاندې ناټو په يو بيان کې ويلي وؤ په جنوبي افغانستان کې دگل په ورځ ٤ امريکايي پوځيان هاغه وخت وژل شوي کله چې دناټو ځواکونو دوه هيلي کاپټرې په هوا کې ديو بل سره ټکر شوې.
په دغه پيښه کې دوه کسان ژوبل شوي هم دي.
دامريکايي پوځ کرنل ويني شينکس په دغه هکله ويلي دي ددغه دواړو پيښو پلټنې روانې دي.
په افغانستان کې دامريکا يي او ائتلافي ځواکونو لپاره سږنى کال زيات خونړى ثابت شوى دى او په روانه مياشت کې دغلته تراوسه ٣٠ امريکايي پوځيان وژل شوي دي.  
په افغانستان کې دامريکايي پوځيانو دمړينې په شميره کې دغه زياتوالى په داسې حال کې مخې ته راغلى دى چې په امريکا کې چارواکي افغانستان ته دنورو پوځيانو دليږدولو يا نۀ ليږدولو په بحث کې بوخت دي.
طالبانو يا کومې بلې تندروه ډلې تراوسه ددغو الوتکو درانسکوريدو مسؤليت پخپله غاړه نۀ دى اخستى خو عموماً افغانستان کې دالوتکو دپريوتلو دپيښو مسؤليت طالبان په غاړه اخلي.