پیښور کې شوې د یوې ځانمرگي برید ورسته د منظر عکس

دپاکستان دصوبه سرحد په سرښار پيښور کې پرله پسې په دوهمه ورځ ترسره شوي ځانمرگي بريد کې ديو پوليس عسکر په گډون څلور کسان وژل شوي او پنځه نور ژوبل شوي دي.
دغه پيښه نن دگل په ورځ دپيښور په رينگ روډ لطيف اباد سيمه کې هاغه مهال رامينځته شوه کله چې پوليسو دڅارنې په يو پاټک يوې شکمنې رکشې ته داودريدلو وينا وکړه.
پوليس چې کله ددغه رکشې دلټونې په غرض درکشې خوا ته ورروان شول نو په رکشه کې ناست ځانمرگي تن ځان پسې تړلو چاؤديدونکو موادو ته انفجار ورکړو چې له امله يې دوحيدالله په نوم دپوليسو يو عسکر او په رکشه کې ناست درې کسان ووژل شول.
دپيښور دپوليسو مشر يا ايس ايس پي کريم خان ډيوه ريډيو سره په خبرو کې وويل دپيښې دځايې څخه په لږه فاصله کې په يو مارکيټ اور لگيدلى ؤ او گڼ پوليس او عام خلک ددغه اور په خوا کې راجمع شوي وؤ.
ښاغلي کريم خان وويل داسې معلوميده ځان وژونکي غوښتل داور ځايې ته ځان ورسوي او هلته ځان پسې تړلي بارودي مواد وچوي.
دپوليسو مشر وويل پوليسو دخپل ځان په پرواه نۀ کولو دورانکارۍ دغه ستره دسيسه شنډه کړې ده.
هغه وويل کۀ چرې ځان وژونکى داور لگيدلو ځايې ته رسيدلى وى نو هلته به ځانمرگي بريد زيات نقصان اړولى وى.
دپيښورد ضلعي انتظاميې دمشر صاحبزاده انيس وينا ده په دغه ځان وژونکي بريد کې ديو عسکر او ځانمرگي په گډون ٤ کسان وژل شوي دي.
ښاغلي انيس خبريالانو ته ويلي دي په پيښور کې دا مهال کلک امنيتي گامونه اخستل شوي او پوليس ښار ته په راننوتونکو لارو دشکمنو گاډو او خلکو سخته لټه کوي.
بايد وويل شي پرون هم دپيښور سره نزدې په متنو سيمه کې دڅاروؤ ديوې منډۍ مخې ته په ترسره شوي ځانمرگي بريد کې دسيمه ييز ناظم او دامن دلښکر دمشر عبدالمالک په گډون ١٦ کسان وژل شوي او گڼ شمير نور ژوبل شوي وؤ.
ددغه ځانمرگي بريد مسؤليت دپاکستاني طالبانو غورځنگ په غاړه اخستى ؤ خو دگل په ورځ دترسره شوي ځانمرگي بريد مسؤليت تر دې دمه کومې ډلې په غاړه نۀ دى اخستى.
دپاکستان په قبائيلي سيمه جنوبي وزيرستان کې دتندلارو په ضد دپوځ لخوا دعملياتو پيل کيدو سره سم په صوبه سرحد او دهيواد په نورو بيلا بيلو برخو کې دځانمرگي بريدونو او بمي چاؤدنو لړۍ تنده شوې او يواځې په صوبه سرحد کې ترسره شوؤ دورانکارۍ دغه رقم پيښو کې د٣٠٠ؤ څخه زيات کسان وژل شوي دي.