د صوبه سرحد دملاکنډ ، سوات او بونير سيمو څخه دپوځي عملياتو له امله دبې کوره شوؤ لکونو کډوالو دبيرته ستنيدنې لړۍ د گل دورځې څخه پيل کيږي.

د صوبه سرحد دملاکنډ ، سوات او بونير سيمو څخه دپوځي عملياتو له امله دبې کوره شوؤ لکونو کډوالو دبيرته ستنيدنې لړۍ د گل دورځې څخه پيل کيږي.
دصوبه سرحد حکومت وايي دکډوالو دبيرته ستنيدنې لپاره يې بشپړ انتظامات کړي دي.
نن داتوار په ورځ دسرحد حکومت لخوا دسرحد حکومت لخوا دجاري کړل شوې اعلاميې له مخې بې کوره شوي خلک به دسبا څخه دلمړي پړاو په اساس ملاکنډ ، سوات او بونير ته ستنيږي او دغه لړۍ به تر ٥ؤ ورځو دوام ولري.
صوبايي حکومت وايي دوهم او ٤م پړاؤ به ددريوؤ ، دريوؤ ورځو وي.
په اعلاميه کې په ډاگه کړل شوې ده چې په لمړي پړا ؤ کې به سوات او بونير ته ټولټال ٣٢ زره بې کوره شوي کډوال ستنيږي او هغوي ته به دستنيدنې ټولې اسانتياوې صوبايي حکومت ورکوي.
دصوبه سرحد دواکمن گوند عوامي نيشنل پارټۍ مرکزي وياند سناتور زاهد خان ډيوه راډيو  سره په ځانگړو خبرو کې ويلي دي کومې سيمې چې دتندلارو څخه پاکې کړل شوي دي حکومت هلته دکډوالو دستنيدنې دپاره بشپړ انتظامات ترسره کړي دي.
زاهد خان زياته کړه ددغه خلکو دامنيت نيونې دپاره به د١٥٠٠ؤ پوليسو په گډون پوځيان هم په هاغو سيمو کې موجود وي.
وياند وويل دبيرته ستنيدونکو کډوالو په سيمو کې دبجلۍ گاز او اوبو اسانتياوې ورکړل شوي ، سکولونه او روغتونونه هم رغول شوي او حکومت به ستنيدونکو کډوالو سره  ديوې مياشتې دخوراکي موادو کومک هم کوي.
ديوې پوښتنې په ځواب کې سناتور زاهد خان وويل دپوځي عملياتو له امله غرونو ته دختلو جنگيالو دبيرته راکوزيدلو او دکډوالو ژوند ته دخطر پيښولو گواښ داحتمال څخه بهر نۀ دى خو دکډوال دځان ومال خوندي کولو لپاره به پوځ په دغو سيمو کې موجود وي.
هغه وويل اولس او پوځ به په گډه دجنگيالو او ترهه گرو مخه نيسي.
بايد وويل شي دجولايي د١٣مې نيټې څخه دبې کوره شوؤ کډوالو دبيرته ستنيدنې اعلان دپاکستان صدراعظم يوسف رضا گيلاني تيره اوونۍ ديو مطبوعاتي کانفرنس په مهال کړى ؤ.
دعوامي نيشنل گوند مرکزي وياند دپاکستان دمرکزي حکومت لخوا دکډوالو دستنيدنې په لړ کې دمرکزي حکومت لخوا په اخستل شوؤ گامونو مطمئن نۀ دى او ډيوه راډيو ته يې وويل مرکزي حکومت چې دکډوالو دبيرته پځايې کولو لپاره د٥٠ کروړه روپو دکومک کوم اعلان کړى ؤ هغه مرستې يې تراوسه نۀ دي ورکړي.
ښاغلي زاهد خان زياته کړه تر دې مهاله مرکز دا هم صوبايي حکومت ته نۀ ده په ډاگه کړې چې نړيوالې ټولنې دکډوالو لپاره څومره مرستې اعلان کړي ، دهغو مرستو له جملې څخه حکومت ته څومره مرستې ترلاسه شوي دي.