Piştî ku artêşa Tirk hefteya çûyî herêmên li bakurê Îraqê ku çekdarên PKK û PJAK lê bingeh in bi firokeyaên şerrî bombebaran kiribû, şer û pevçûna di navbera serbazên Tirk û serhildayên Kurd ranaweste.

Li du daxuyaniya Serfermandariya artêşa Tirk komeke qelebalix a çekdarên PKK duh bişev avêt ser qereqola Bêzelê (Aktütün) ya li navçeya Şemzînan a bi ser Colemêrgê.

Di daxuyaniyê de hat ragihandin ku di encama vê êrîşê de 6 serbazên Tirk hatine kuştin. Serfermandarî her weha îddîa kir ku wan 19 serhildayên Kurd jî kuştine lê PKK di daxuyaniya xwe ya sebaret bi vê êrîşê diyar kir ku ev yek ne rast e û çi endamên wan nehatiye kuştin. Hêjayî gotinê ye li herêmê tu çavkaniyên serbixwe nîn in ku van îddîayan piştrast bikin. Her weha hat ragihandin ku di şer de 2 kesên sivîl jî hatine birîndar kirin ku yek ji wan zarokekî 12 salî ye û rewşa wî xedar e.

Heger bê bi bîr anîn di payîzê de jî PKKê avêtibû ser bingeheke leşkerî ya li Oremarê ku 20 kîlometre dûrî Bêzelê ye. Di encama vê serdegirtinê de 12 serbazên Tirk hatibûn kuştin 8 serbaz jî dîl ketibûn destê PKKê.

Çavkaniyên herêmî dibêjin êrîşa duh êvarê di êrîşa Oremarê jî mezintir e. Tê ragihandin ku êrîşa duh di çend salên dawîn de êrîşa herî mezin e ku ji aliyê PKKÊ ve li dij serbazan pêk hatiye. Di êrîşê de ku tê de çekên giran jî hatine bikaranîn gêrîla gelekî nêzîkî avahiya qereqolê hatine.

Her weha PKKê dibêje wan du avahiyên qereqolê rûxandine û gelek mekîneyên leşkerî yên di hewþûşa qereqolê de bûn şikeştine. Hat ragihandin piştî vê êrîşê serbaz û zêrevanên gundan li herêmê operasyoneke berfireh daye dest pê kirin. Di vê çarçoveyê de ji sere sibê de gelek helicopter daketine bingeha leşkerî her weha gelek ambulans jî di bingehê derketine.

Hevdem hat ragihandin li navçeya Şîrvan a bi Sêrtê zêrevanekî gund ji ber teqîna mayinekê hatiye birîndar kirin. Her wehan li navçeya Bazîd a ser bi bajarê Agirî mekîneyeke leşkerî qulupî û di encamê de 8 serbaz hatin birîndar kirin.