Li her alîyê Rojhilata Navîn xelk li hember bombe û kuştinan radiwestin da nîşanî dinyayê bidin ku ew dixwazin azad bijîn.  Serok George W. Bush dibêje herêm di dîrokê de gihîştîye nuqteyeke girîng.  Dibêje;

‘‘12 milyon Iraqîyên ku li ber çavê terorîstan bi destûrnameyeke demokratîk dengê xwe dan û hikumeteke azad ava kirin em daxwaza azadîyeke cîhanî dibînin di vê helwestê de.  8 mîlyon Afganîyên ku ketin dorê û piştî demeke durûdirêj cara yekem di dîroka xwe de bi rîya demokratîk serokê xwe hilbijartin;  em daxwaza azadîyeke cîhanî dibînin di vê helwesta wan de.  Em daxwaza azadîyeke cîhanî dibînin di helwesta Libnanîyan de ku daketin nav kolanan bo doza azadîyê bikin û alîkarîyê dan ku hêzên Sûrî ji welatê wan derên’’. 

Rêzdar Bush axaftina xwe didomîne û dibêje ‘‘Pirsgirêka li Rojhilata Navîn îro ne ewe ku xelk azadîyê naxwaze’’ dibêje ‘‘ Mesele ewe ku demokrasîyên ku wan hê nû ava kirine û nûgihayî ne hêjî li hember terorîst û piştevanên terorîstan bêpişt in.  Kêmasîyeke din jî ewe ku li herêmê gelek ji wan hikumetên nû yên demokratîk hêjî nikarin li ser temamê erdê xwe hukmê xwe bi rêve bibin û kontrol bikin.  Hem li Libnanê hem jî li Iraqê hikumetên hilbijartî şer dikin li hember komeleyên çekdar û dirrinde yên ku dixwazin ew bê hal bikin û karê wan tevlî hev bikin.  Li Libnanê Hîzbullah bêy ku heya hikumeta hilbijartî ya li Beyrûdê jê hebe şerekî îlan kir li hember Îsraîla hevsînor.’’

Rêzdar Bush dibêje mesaj gelek dîyar e ‘‘ Welatên Yekgirtîyên Amerîka wê li dijî El Qaîde şerê xwe bi domîne.  Lazime Îran dev ji piştevanîya terorê berde û rêberên komeleyên çekdar jî biryara xwe bidin, eger ew bixwazin di welatê xwe de sîyasetê bikin lazime dev ji çekan berdin.’’ Dibêje ‘‘Rêberên hilbijartî nikarin ji alîkî ve xwe di nav demokrasîyê de bi cî bikin û ji alîkî din ve jî di nav terorê de.’’