دكتۆرێـكی چینی له‌ شـاری هێفه‌ی له‌ ڕۆژهه‌ڵاتی چین سه‌یری ناو ده‌می منداڵـێـك ده‌كات بۆ گه‌ڕان به‌ دوای ئاسه‌واری ڤایرۆسی هه‌ناوی ژماره‌ 71 ی كوشنده‌ بۆ منداڵان، سێشه‌ممه‌ 6 ی پـێـنجی 2008

لێپـرسـراوانی ته‌ندروسـتی چینی و نێونه‌ته‌وه‌یی ده‌ڵێن ئه‌وان پـێـكه‌وه‌ له‌ نزیكه‌وه‌ كارده‌كه‌ن له‌پـێناو به‌گژداچوونه‌وه‌ی ئه‌و ڤایرۆسه‌ كوشـنده‌یه‌ی ڕیخۆڵه‌، ئه‌وه‌ی تا ئێسـتا 28 منداڵی له‌ چین كوشـتووه‌.

له‌ میانه‌ی كۆنفرانسـێـكی ڕۆژنامه‌وانی هاوبه‌شـی ڕۆژی چوارشه‌ممه‌ له‌ په‌كین وته‌بێژی وه‌زاره‌تی چینی و نوێنه‌ری باڵای ڕێـكخراوی ته‌ندروسـتی جیهانی هانز ترۆێدسـسه‌ن وتیان ڕه‌نگه‌ نه‌خۆشـیـیه‌كه‌ له‌ مانگه‌كانی شه‌ش و حه‌وتی داهاتوودا په‌ره‌بسێنێت.

هاوكات لـێـپـرسـراوان ده‌شڵێن ژماره‌ی قوربانیان و دووچاربووانی نه‌خۆشـیـیه‌كه‌ به‌رز بـبێته‌وه‌ ئه‌مه‌ش به‌هۆی ئه‌و فه‌رمانه‌ نوێـیه‌ی كه‌ ده‌بێت سه‌رجه‌م حاڵه‌ته‌كانی نه‌خۆشی ڤایرۆسی ڕیخۆڵه‌ی منداڵان وه‌زاره‌تی ته‌ندروستی چینی لێ ئاگاداربكرێته‌وه‌.