 |
| ກາເຟລາວ ປູກເພື່ອສົ່ງອອກ 150.jpg |
ກົມການຄ້າຂາອອກ
ແລະ ຂາເຂົ້າ ຂອງກະຊວງອຸດສະຫະກຳ ແລະ ການຄ້າຂອງລາວ ໄດ້ສະເໜີລາຍງານວ່າ ໃນໄລຍະໄຕຣມາດທຳອິດຂອງແຜນການປະຈຳປີ
2008 ຫາ 2009 ນີ້ກໍຄື ໃນໄລຍະຈາກເດືອນຕຸລາ ຫາ ເດືອນທັນວາ ປີ 2008 ທີ່ຜ່ານມານັ້ນ
ສະພາບວ່າການສົ່ງອອກສິນຄ້າຂອງລາວໄປຍັງຕ່າງປະເທດ ຍັງຄົງເພີ້ມຂຶ້ນໃນອັດຕາສະເລ່ຍເຖິງ
7% ເມື່ອທຽບໃສ່ໃນໄລຍະດຽວກັນຂອງແຜນການປະຈຳປີ 2007 ຫາ 2008 ທີ່ຜ່ານມາ ໂດຍການສົ່ງອອກສິນຄ້າຂອງລາວໄປຕ່າງປະເທດນັ້ນ
ມີມູນຄ່າລວມກັນເຖິງ 276 ລ້ານໂດລ້າສະຫະລັດ ຊຶ່ງໃນຈຳນວນດັ່ງ ກ່າວນີ້ ກໍປະກົດວ່າເປັນການສົ່ງອອກແຮ່ທາດໃນມູນຄ່າລວມເຖິງ
151 ລ້ານໂດລ້າສະຫະລັດ. ແຕ່ຢ່າງໃດກໍຕາມ ສຳລັບໃນໄລຍະໄຕຣມາດທີ່ 2 ຂອງແຜນການປະຈຳປີ
2008 ຫາ 2009 ນີ້ ກໍຄື ໃນໄລຍະຈາກເດືອນມັງກອນ ຫາ ເດືອນມີນາ ທີ່ຜ່ານມານັ້ນ
ກໍປະກົດວ່າ ມູນຄ່າການສົ່ງອອກສິນຄ້າຂອງລາວ ໄປຍັງຕ່າງປະເທດ ໄດ້ຫລົດລະດັບລົງເຖິງ
11% ກວ່າ ເມື່ອທຽບໃສ່ກັບໃນໄລຍະດຽວກັນ ຂອງແຜນການປະຈຳປີ 2007 ຫາ 2008 ທີ່ຜ່ານມາ
ໂດຍມີສາເຫດສຳຄັນ ມາຈາກວິກິດການທາງເສດຖທະກິດການເງິນໂລກ ທີ່ໄດ້ສົ່ງຜົນກະທົບຕໍ່ປະເທດລາວຢ່າງຫລີກລ້ຽງບໍ່ໄດ້
ແລະ ໃນຂະນະດຽວກັນ ກໍໄດ້ເຮັດໃຫ້ ການສັ່ງຊື້ສິນຄ້າຂອງລາວຈາກຕ່າງປະເທດ ໄດ້ຫລຸດລົງຢ່າງຕໍ່ເນື່ອງໃນທຸກປະເພດສິນຄ້າ
ຊຶ່ງລວມໄປເຖິງ ການສັ່ງຊື້ສິນຄ້າປະເພດແຮ່ທາດຂອງລາວຈາກຕ່າງປະເທດອີກດ້ວຍ.
![[insert caption here]](/lao/images/l-adb-eco-outlook.gif "[insert caption here]") |
| [ກອງປະຊຸມຈັດໂດຍລັດຖະບານລາວ ແລະ ADB ] |
ຍິ່ງໄປກວ່ານັ້ນ ເມື່ອຖືກສົມທົບກັບສະພາວະການຂອງຄ່າເງິນກີບລາວທີ່ມີການແຂ່ງຄ່າຂຶ້ນຢ່າງຕໍ່ເນື່ອງ
ເມື່ອທຽບໃສ່ກັບເງິນສະກຸນຕ່າງປະເທດ ໂດຍສະເພາະແມ່ນເງິນບາດ, ເງິນໂດລ້າສະຫະລັດ,
ແລະ ເງິນຢູໂຣ ຂອງສະຫະພາບຢູໂຣບ ອີກແລ້ວ ກໍຍິ່ງເຮັດໃຫ້ສິນຄ້າຂອງລາວມີລາຄາແພງຂຶ້ນໃນສາຍຕາຂອງລູກຄ້າໃນຕ່າງປະເທດ
ຊຶ່ງກໍໄດ້ສົ່ງຜົນກະທົບຕໍ່ເນື່ອງ ເຮັດໃຫ້ການສົ່ງອອກສິນຄ້າຂອງລາວໄປຍັງຕ່າງປະເທດຕ້ອງລົດ ໜ້ອຍຖອຍລົງຢ່າງຫລີກລ້ຽງບໍ່ໄດ້ເຊັ່ນກັນ.
ແຕ່ຢ່າງໃດກໍຕາມ ການແຂງຄ່າຂຶ້ນຂອງເງິນກີບລາວ ກໍຍັງມີຜົນດີເຊັ່ນດຽວກັນ
ໂດຍສະເພາະແມ່ນການນຳເຂົ້າສິນຄ້າປະເພດທຶນ ແລະ ສິນຄ້າ ອຸປະໂພກບໍລິໂພກນັ້ນ
ຖືວ່າ ເປັນຜົນດີຢ່າງຍິງຕໍ່ປະຊາຊົນລາວ ແລະ ກຸ່ມລົງທຶນຈາກຕ່າງປະເທດໃນລາວ
ດັ່ງທີ່ເຈົ້າໜ້າທີ່ຂຶ້ນສູງ ໃນກະຊວງອຸດສາຫະກຳ ແລະ ການຄ້າຂອງລາວ ໄດ້ໃຫ້ການຊີ້ແຈງຕອນໜຶ່ງ
ວ່າ:
ຖ້າວ່າເງິນແຂງຄ່າຫລາຍ ມັນຈະເປັນຜົນກະທົບຕໍ່ການສົ່ງອອກ
ເພາະວ່າຈະເຮັດໃຫ້ການແກ້ງແຍ້ງແຂ່ງຂັນຂອງລາຄາສິນຄ້າເຮົາສົ່ງອອກຫັ້ນ ມັນຫລຸດລົງລາຄາສິນຄ້າທີ່ສົ່ງອອກຈະສູງຂຶ້ນ
ເຮັດໃຫ້ຂາຍຍາກ ອັນນີ້ແມ່ນຜົນເສຍ. ແຕ່ວ່າໃນເງື່ອນໄຂໃນຄວາມເປັນຈິງໃນລາວເຮົານີ້
ມາເບິ່ງນຳກັນແລ້ວ ປະເທດເຮົານີ້ ຍັງເປັນປະເທດນຳເຂົ້າ, ຄືພວກເຮົາເຫັນນຳກັນໜີ້
ສິນຄ້າໃຊ້ສອຍສ່ວນໃຫຍ່ນີ້ ຍັງແມ່ນເອົາເຂົ້າມາ ລວມທັງໃຊ້ສອຍໃນຊີວິດປະຈຳວັນ ລວມທັງສິນຄ້າມາລົງທຶນ
ກໍຍັງແມ່ນນຳເຂົ້າທັງໝົດ. ສະນັ້ນລະແມ່ນວ່າ ເງິນກີບແຂງໜີ້ ມັນຈະເປັນຜົນດີຕໍ່ການນຳເຂົ້າ.
ສ່ວນທາງດ້ານທະນາຄານພັດທະນາແຫ່ງເອເຊຍ
ຫລື ADB ກໍໄດ້ສະເໜີລາຍງານກ່ອນໜ້ານີ້ ວ່າ ການທີ່ພາກການສົ່ງອອກສິນຄ້າຂອງລາວໄປຍັງຕ່າງປະເທດ ໄດ້ຮັບຜົນກະທົບຢ່າງໜັກ ໜ່ວງ ຈາກບັນຫາວິກິດຕະການທາງເສດຖະກິດການເງິນໂລກນັ້ນ
ກໍຍັງຈະສົ່ງຜົນກະທົບຕໍ່ເນື່ອງ ເຖິງລະດັບລາຍຮັບທາງດ້ານງົບປະມານ ໂດຍສະເພາະແມ່ນລາຍຮັບຈາກພາສີຂາອອກຂາເຂົ້າຂອງລັດຖະບານລາວຢ່າງຫລີກລ້ຽງບໍ່ໄດ້ເຊັ່ນດຽວກັນ
ຊຶ່ງກໍເປັນຜົນເຮັດໃຫ້ລັດຖະບານລາວ ຕ້ອງເພິ່ງພາການຊ່ອຍເຫລືອທາງດ້ານງົບປະມານຈາກຕ່າງປະເທດ
ຫລາຍຕື່ມຂຶ້ນອີກ ຖ້າຫາກວ່າລັດຖະບານລາວບໍ່ສາມາດທີ່ຈະບຸກເບີກ ຫລື ຊອກຄົ້ນຫາແຫລ່ງລາຍຮັບ
ຈາກແຫລ່ງລາຍຮັບໃໝ່ໆໄດ້ ຢ່າງພຽງພໍກັບຄວາມຕ້ອງການ ສຳລັບໃນດ້ານຂອງງົບປະມານລາຍຈ່າຍປະຈຳປີ
2008 ຫາ 2009 ນີ້. ຊຶ່ງຕໍ່ກໍລະນີດຽວກັນນີ້ ທ່ານ ບົວສອນ ບຸບພາວັນ ນາຍົກລັດຖະ ມົນຕີລາວ
ກໍໄດ້ຖະແຫລງ ຍອມຮັບວ່າ ລັດຖະບານລາວ ຈະຕ້ອງປະເຊີນກັບສະພາວະຂາດດຸນທາງດ້ານງົບປະມານຢ່າງຫລີກລ້ຽງບໍ່ໄດ້
ໂດຍໃນຂັ້ນເບື້ອງຕົ້ນ ກໍປະມານການວ່າ ລັດຖະບານລາວ ຈະຂາດດຸນທາງດ້ານງົບປະມານຄຶດເປັນມູນຄ່າລວມຫລາຍກວ່າ
3,000 ຕື້ກີບ ຫລື ເກີນກວ່າ 350 ລ້ານໂດລ້າສະຫະລັດ ໃນຕະຫລອດໄລຍະແຜນການປະຈຳປີ
2008 ຫາ 2009 ນີ້.
ຊົງຣິດ ໂພນເງິນ ລາຍງານຈາກບາງກອກ ໃນວັນທີ 17 ເມສາ 2009
E-mail
Print
