 |
| ສ່ວນນື່ງຂອງຊາວມົ້ງ ທີ່ຖືກຂັງ ຢູ່ໜອງຄາຍ |
ທາງການລາວຕັ້ງຂໍ້ສົງໃສຕໍ່ທ່າທີ່ຂອງລັດຖະ ມົນຕີວ່າ ການຕ່າງປະເທດຂອງໄທທີ່ມີຕໍ່ ບັນດາຊາວມົ້ງຈຳນວນ 158ຄົນ ທີ່ຖືກຄຸມຂັງຢູ່ສຳນັກງານຕຳຫລວດກວດຄົນເຂົ້າເມືອງປະຈຳຈັງຫວັດໜອງຄາຍ ພາຍຫລັງທີ່ລັດຖະ ມົນຕີວ່າການຕ່າງປະເທດຂອງໄທ ໄດ້ກ່າວອອກມາຢ່າງຈະແຈ້ງວ່າ ຊາວມົ້ງເຫລົ່ານັ້ນມີສິດທີ່ຈະຂໍລີ້ໄພທາງການເມືອງໄປຢູ່ໃນປະເທດທີສາມໄດ້.
ສືບເນື່ອງມາຈາກການທີ່
ທ່ານ ກະສິດ ພິຣົມ ລັດຖະມົນ ຕີວ່າການຕ່າງປະເທດຂອງໄທ ໄດ້ລະບຸວ່າ ຊາວມົ້ງຈຳ ນວນ
158 ຄົນ ທີ່ຖືກຄຸມຂັງຢູ່ສຳນັກງານຕຳຫລວດກວດຄົນເຂົ້າເມືອງປະຈຳຈັງຫວັດໜອງຄາຍຂອງໄທນັ້ນ
ເປັນກຸ່ມບຸກຄົນທີ່ມີສິດທີ່ຈະຂໍເດີນ ທາງໄປຂໍລີ້ໄພທາງການເມືອງຢູ່ໃນຕ່າງປະເທດ
ຫລື ປະເທດທີສາມໄດ້ ໂດຍເປັນການລະບຸໃນລະຫວ່າງການພົບປະເຈລະຈາຮ່ວມກັນກັບ
ທ່ານນາງ ແຮລລາຣີ ຄລິນເຕິນ (Hillary Clinton) ລັດຖະມົນຕີວ່າການຕ່າງປະເທດຂອງສະຫະ ຣັດອາເມຣິກາໃນສັບປະດາ ກ່ອນ
ໜ້ານີ້ ກໍໄດ້ເປັນຜົນເຮັດໃຫ້ ທ່ານ ເຄນທອງ ນວນທະສິງ ໂຄ ສົກຄົນໃໝ່ຂອງກະຊວງການຕ່າງປະເທດຂອງລາວນັ້ນ
ໄດ້ອອກມາສະແດງເຖິງຄວາມສົງໄສທີ່ມີຕໍ່ການລະບຸດັ່ງກ່າວຂອງ ທ່ານ ກະສິດ
ແລ້ວໃນຂະນະນີ້.
![[insert caption here]](/lao/images/l-hmong-returnees.gif "[insert caption here]") |
| ເຈົ້າໜ້າທີ່ທາງການລາວ ທຳການຢ້ຽມຢາມ ຊາວ ມົ້ງຫ້ວຍນ້ຳຂາວທີ ກັບຄືນໄປລາວ |
ທັງນີ້ກໍເນື່ອງຈາກວ່າ
ທາງການລາວ ແລະ ໄທໄດ້ຕົກລົງຮ່ວມກັນນັບຕັ້ງແຕ່ຕອນປີ 2006 ເປັນຕົ້ນມາແລ້ວວ່າຊາວມົ້ງທຸກຄົນທັງທີ່ຢູ່ໜອງຄາຍ ແລະ ທີ່ພັກອາໃສຢູ່ສູນຮອງຮັບຊົ່ວຄາວ ບ້ານຫ້ວຍນ້ຳຂາວໃນເຂດອຳເພີເຂົາຄໍ້ຈັງຫວັດເພັດສະບູນທາງພາກເໜືອຕອນຫລ່າງຂອງປະເທດໄທນັ້ນ
ມີສະຖານະເປັນຄົນເຂົ້າເມືອງໄທໂດຍຜິດກົດໝາຍ ຊຶ່ງຈະຕ້ອງຖືກສົ່ງກັບຄືນໄປລາວທັງໝົດ.
ໂດຍນັບຈາກປີ 2007 ເປັນຕົ້ນມາ ທາງການໄທກໍໄດ້ສົ່ງຊາວມົ້ງຈາກບ້ານຫ້ວຍນ້ຳ ຂາວ ກັບຄືນໄປໃຫ້ທາງການລາວແລ້ວ ຈຳນວນຫລາຍກວ່າ 2,800 ຄົນ ແລະ ຊຸດຫລ້າສຸດໃນຈຳນວນ 298 ຄົນນັ້ນ ກໍໄດ້ມີການສົ່ງມອບໃຫ້ກັບທາງການລາວຢ່າງເປັນທາງການເມື່ອວັນທີ 29 ເມສາ ທີ່ຜ່ານມານີ້ ໂດຍຍັງຄົງເຫລືອຢູ່ 5,000 ກວ່າຄົນ ທີ່ຈະຕ້ອງສົ່ງກັບຄືນໄປລາວໃຫ້ໝົດພາຍໃນທ້າຍປີນີ້ຕໍ່ໄປ. ເພາະສະນັ້ນໃນເມື່ອວ່າທ່ານ ກະສິດ ໄດ້ລະບຸໄປໃນອີກແນວທາງນຶ່ງ
ຈຶ່ງເຮັດໃຫ້ທາງການລາວ ເກີດຄວາມສັບສົນວ່າ ຈຸດຢືນຂອງທາງ ການໄທນັ້ນ ເປັນແນວໃດ
ໂດຍສະເພາະຢ່າງຍິ່ງຈຸດຢືນຂອງທ່ານ ກະສິດ ພິຣົມ ຊຶ່ງທາງການລາວນັ້ນ ຕ້ອງການທີ່ຈະໄດ້ຮັບການອະທິ ບາຍຢ່າງຮີບດ່ວນທີ່ສຸດ.
ຫາກແຕ່ວ່າ ຈົນເຖິງຂະນະນີ້ກໍຍັງຄົງບໍ່ມີຄຳອະທິບາຍຈາກທ່ານ ກະສິດແຕ່ຢ່າງໃດ.
ຫາກແຕ່ວ່າ
ດ້ວຍການຖະແຫລງດັ່ງກ່າວຂອງ ທ່ານ ກະສິດ ກໍໄດ້ເຮັດໃຫ້ເຈົ້າໜ້າທີ່ລະດັບປະຕິ ບັດການຂອງໄທນັ້ນ
ເກີດຄວາມສັບສົນຢູ່ບໍ່ໜ້ອຍເຊັ່ນດຽວກັນ, ແຕ່ຈັ່ງໃດກໍຕາມ ເນື່ອງຈາກວ່າ ຈົນເຖິງຂະນະນີ້
ກໍຍັງຄົງບໍ່ມີຄຳສັ່ງຈາກລະດັບນະໂຍບາຍໃຫ້ມີການປ່ຽນແປງການດຳເນີນການທີ່ຈະຕ້ອງປະຕິບັດຕໍ່ຊາວມົ້ງເຫລົ່ານີ້
ຈຶ່ງເຮັດໃຫ້ເຈົ້າໜ້າລະດັບປະຕິບັດງານ ຍັງຄົງຕ້ອງຍຶດຖືຕາມຂໍ້ຕົກລົງທີ່ໄດ້ເຮັດໄວ້ລະຫວ່າງທາງການລາວກັບໄທ.
ສ່ວນກ່ຽວກັບການເບິ່ງແຍງຂອງທາງການລາວ ທີ່ຈະປະຕິບັດຕໍ່ບັນດາຊາວມົ້ງທີ່ຈະຖືກສົ່ງກັບຄືນໄປລາວ
ກໍໄດ້ຮັບການຊີ້ແຈງຈາກ ທ່ານ ພົນຈັດຕະວ່າ ບົວສ້ຽງຈຳປາພັນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວໃນຕອນນຶ່ງວ່າ:
ຕໍ່ກັບພາກສ່ວນທີ່ສະໝັກໃຈໄປຢູ່ບ້ານພັດທະນາໃໝ່.
ນຶ່ງ ປຸກເຮືອນໃຫ້ຄອບຄົວລະ 1 ຫລັງ. ພື້ນທີ່ນີ້ ກໍແບ່ງໃຫ້ກວ້າງຂວາງເພາະວ່າ ໃນອານາຄົດເຂົາເຈົ້າຈະຫາເງິນຫາທອງແລ້ວຈະຕັ້ງເຮືອນໃຫຍ່
ກວ້າງກວ່ານັ້ນ,
ສອງ ຈະຈ່າຍເຂົ້າໃຫ້ກິນໜຶ່ງປີເຕັມ,
ສາມ ເອົາໄຟຟ້າເຂົ້າໄປເຮືອນ
ແລະນຳໃຊ້ກະແສໄຟຟ້າໜຶ່ງປີໄປ 1ປີບໍ່ໃຫ້ເສຍເງິນ ,
ສີ່ ກໍເອົາເງິນໃຫ້ຜູ້ລະສາມແສນໃນເບື້ອງ ຕົ້ນຄືກັນ,
ຫ້າ ພວກເຮົາດຳເນີນການກໍ່ສ້າງພື້ນຖານໂຄງ ຫລ່າງເພື່ອຮອງຮັບເຮັດໃຫ້ພີ່ນ້ອງຈຳ ນວນນີ້
ມີບ່ອນຜະ ຫລິດຄົງທີ່ເປັນຂອງຕົວເອງຍາວນານ. ຕັ້ງໂຮງຮຽນ ເອົານາຍຄູໄປສິດສອນ
ຕັ້ງສຸກສະລາ ປະກອບແພດ ປະກອບຢາ.
ພ້ອມກັນນັ້ນ ກໍອານຸຍາດໄປຢາມພີ່ນ້ອງຕ່າງບ້ານຕ່າງແຂວງ
ແລະ ອານຸຍາດໃຫ້ພີ່ ນ້ອງຕ່າງບ້ານຕ່າງແຂວງມາຢ້ຽມຢາມຕົນເອງໄດ້, ແລະ ກໍມີສິດ ອິດສະລະພາບ
ຄື ກັບພົນລະເມືອງຄົນອື່ນ ແລ້ວກໍເຮັດສຳມະໂນຄົວ ຖ້າມີຄວາມຈຳເປັນຕ້ອງການຈະໄປຢາມພີ່ນ້ອງຕ່າງປະເທດ
ພວກຂ້າພະເຈົ້າ ກໍຈະເຮັດປັດສະປໍໃຫ້.
ຊົງຣິດ ໂພນເງິນ
ລາຍງານມາຈາກບາງກອກ ເມື່ອວັນທີ 7 ພຶດສະພາ
E-mail
Print
