Во силен земјотрес во западниот дел на Кина загинаа речиси 8.700 лица, соопштија властите на оваа земја. 

Според официјалната новинска агенција Ксинхуа, околу 8.500 загинале во покраината Сечуан, а над 200 во три други покраини и градот Чонгкинг. 

Засега има малку информации од епицентарот – општината Венчуан, која е дом на преку 100 илјади лица.  Ксинхуа вели дека патиштата до општината се уништени, како и дека невреме ги спречило армиските хеликоптери за спасување да допрат до местото.  Според агенцијата, таму има најмалку 30 загинати, но засега нема дополнителни информации.   

САД и ОН изразија сочувство за жртвите на трагeдијата и велат дека се подготвени да помогнат на секој можен начин. 

Земјотресот со јачина од 7.8 степени се случи понеделникот попладне по локално време и бил почувствуван дури до Такјван и Банкок.  Кинескиот премиер Вен Џибао пристигна во Сечуан со цел лично да ги надгледува спасувачките акции.