ប្រទេសសំខាន់ៗស្វាគមន៍ការលើកលែងទោសលោកសម រង្ស៊ី និងជំរុញឲ្យលោកអាចចូលរួមការបោះឆ្នោត
ប្រទេសសំខាន់ៗក្នុងកិច្ចព្រមព្រៀងសន្តិភាពក្រុងប៉ារីសបានស្វាគមន៍ការសម្រេចព្រះទ័យព្រះមហាក្សត្រខ្មែរលើកលែងទោសមេដឹកនាំប្រឆាំងគឺលោកសម រង្ស៊ី ដែលអនុញ្ញាតឲ្យលោកវិលទៅកម្ពុជាវិញមុនការបោះឆ្នោតសភា។ កាលពីថ្ងៃសុក្រ អ្នកស្រី Jen Psaki អ្នកនាំពាក្យក្រសួងការបរទេសស.រ.អា.បានជំរុញឲ្យរដ្ឋាភិបាលកម្ពុជាអនុញ្ញាតឲ្យលោកសម រង្ស៊ីបានចូលរួមការបោះឆ្នោតដោយសេរី។ កាលពីសប្តាហ៍មុនសមាជិកសភាស.រ.អា.ចង់កាត់ជំនួយស.រ.អា.ទៅប្រទេសកម្ពុជាដែលមានពី៧០ទៅ៨០លានដុល្លារក្នុងមួយឆ្នាំៗ បើកម្ពុជាមិនធ្វើការបោះឆ្នោតសេរី និងយុត្តិធម៌។ ក្រសួងការបរទេសបារាំងក៏ចេញសេចក្តីថ្លែងការណ៍ថា នេះជាជំហានវិជ្ជមានសម្រាប់ការបោះឆ្នោតនៅថ្ងៃទី២៨កក្កដានេះ។ ពិន ស៊ីសុវណ្ណរាយការណ៍ពីរដ្ឋធានីវ៉ាស៊ីនតោន៕
